د افغانستان لپاره د ملګروملتونو ځانګړي رپورټر ریچارډ بنټ له پاکستان یو ځل بیا غوښتنه کړې چې له دغه هېواد د افغان کډوالو د ایستلو پرېکړه دې لغوه کړي.
ریچارډ بنټ سهشنبه د لړم نهمه پر «اېکس» پاڼه لیکلي: «زه له پاکستانه خپله غوښتنه بیا تکراروم چې په ټولییزه توګه د افغان کډوالو د اېستلو پروګرام دې ودروي او له یوه ناورین دې مخنیوی وکړي. زه د افغانانو حقونو څخه هر ډول چې وي، له هغې ډلې پاکستاني چارواکو سره د خبرو له لارې خپلې دفاع ته دوام ورکوم.»
د سلاموطندار پښتو فېسبوکپاڼه وڅارئ
ټاکل شوې چې له پاکستانه د افغان کډوالو د ایستلو لړۍ سبا پنجشنبه لړم یوولسمه پیل شي. پاکستان دغه هېواد کې مېشت ناقانونه افغان کډوالو ته د اکتوبر تر ۳۱مې وخت ورکړی و چې له دغه هېواده ووځي.
له پاکستانه د افغان کډوالو د ایستلو پرېکړه په پراخه توګه له غبرګونونو سره مخ شوې. د بښنې نړیوال سازمان ویلي چې دغه پرېکړه باید لغوه شي او نړیواله ټولنه دې پاکستان سره د افغان کډوالو کوربهتوب له امله مالي مرسته وکړي.