د هند کرېکټ غوره لیګ یا ایپياېل سیالیو په لړ کې نن ماښام پنجاب کنګز لوبډله له ډیلي کپېټلز سره سیالي کوي.
ټاکل شوې چې دغه لوبه نن ماښام ۶:۳۰ بجې د هېماچال پرادېش کرېکټ لوبغالي کې ترسره شي.
د سلاموطندار پښتو فېسبوکپاڼه وڅارئ
پنجاب کنګز لوبډله چې دا مهال په ۱۲ امتیازونو سره د جدول په اتم ځای کې شتون لري، د روان لیګ په وروستیو پنځو سیالیو کې یې یوازې دوه لوبې ګټلي او درې یې بایللي دي.
پنجاب کنګز لا هم د روان ایپياېل لیګ پلې اووف سیالیو ته د لارموندنې چانس لري، خو شرط یې د پاتیو دوو سیالیو ګټل او د نورو لوبډلو ماتې دي.
ډیلي کپېټلز لوبډله چې یاد لیګ یې د مخته تلو چانس له لاسه ورکړی، دا مهال د جدول په وروستي ځای کې شتون لري. ډیلي لوبډلې تراوسه له کړیو دولس سیالیو څخه یوازې څلور لوبې ګټلي دي.
د دواړو لوبډلو ترمنځ په وروستیو پنځو شل اووره سیالیو کې پنجاب کنګز لوبډلې یوازې یو ځل بریا خپله کړې او څلور سیالیو کې بیا ډیلي بریالی شوی دی.
د یاد لیګ په بېګانۍ لوبه کې لکناو سوپر جاینټز لوبډلې ممبی انډیینز ته د پنځو منډو په توپیر ماته ورکړه.