یوشمېر رسنیو د ایران فارس نیوز له قوله راپور ورکړی چې د ایران د نوي ولسمشر مسعود پزشکیان د لوړې مراسمو کې د ګډون په موخه دغه هېواد ته د پاکستان لومړي وزیر شهباز شریف سفر لغوه شوی دی.
ویل کېږي چې ایران ته د شهباز شریف سفر د نوي ولسمشر مسعود پزشکیان په لارښوونه لغوه شوی دی.
د سلاموطندار پښتو فېسبوکپاڼه وڅارئ
بلخوا د پاکستان سما رسنۍ راپور ورکړی چې د شریف روغتیا ښه نهده او د نوموړي پر ځای د هغه مرستیال محمداسحاق ډار ایران ته سفر کړی دی.
د یادې رسنۍ په راپور کې ویل شوي چې شهباز شریف ناروغ دی او د سهشنبې ورځې ټولې غونډې او لیدنې یې لغوه کړې دي.
دغې رسنۍ د نوموړي د ناروغۍ په اړه نور جزییات نهدي ورکړي.
محمداسحاق ډار چې د پاکستان د بهرنیو چارو د وزیر په توګه هم دنده کوي، د لومړي وزیر د مرستیال په توګه د دې دندې ترڅنګ نن سهشنبه، جولای ۳۰مه تهران ته تللی دی.
نوموړی به د خپل سفر په ترڅ کې د ایران د ولسمشر د لوړې په مراسمو کې د پاکستاني پلاوي مشري وکړي.