د کابل امنیې قومندانۍ ویاند خالد ځدراڼ ویلي، د شهرنو د تېرې ورځې چاودنې پر مهال یو چینایي وګړي او شپږو افغانانو ژوند بایللی.
هغه پر ایکسپاڼه لیکلي چې تېره ورځ شاوخوا درې بجې د کابل ښار د شهرنو په ګلفروشي کوڅه کې د چينايي مسلمان او افغانانو ګډ رستورانت Chinese Noodle کې چاودنه شوې.
ده ویلي، رستورانت د يو چينايي مسلمان عبدالمجید او د ده د ميرمنې او يو تن افغان عبدالجبار محمود له لوري په ګډه چلول کېده.
د نوموړي په وینا، په دغه چاودنه کې یو تن چينايي تبع ایوب چې مسلمان و او ۶ افغانانو ژوند بایللی او څو نور ټپيان دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
خالد ځدراڼ همدارنګه ویلي چې د چاودنې څرنګوالی تراوسه نه دی روښانه شوی او په اړه یې څېړنې روانې دي.
ورته وخت کې د کابل کې ایمیرجنسي روغتون ویلي، شهرنو سیمه کې له چاودنې وروسته دغه روغتون ته ٢٠ کسان د درملنې لپاره ور وړل شوي.
دغه روغتون هم پر ایکسپاڼه لیکلي چې د دغو کسانو له ډلې ٧ یې ژوند بایللی دی.
الجزیرې خبري شبکې راپور ورکړی چې د کابل ښار د تېرې ورځې چاودنې مسوولیت د داعش ډلې منلی دی.