د سرپرست حکومت چارواکي وايي چې په سرپل کې د قشقري نفتو بلاک کې له اتو نورو څاګانو څخه د نفتو د استخراج چار پیل شوې.
له یادو څاګانو د استخراج چارو پیلېدو سره د قشقري نفتو حوزه کې د نفتو استخراج کچه د ورځې ۸۰۰ مترمکعب ته رسېږي.
د چارواکو په وینا، دا مهال د قشقري نفتو بلاک کې له ۱۷ څاګانو د استخراج چارې روانې دي چې ورسره شاوخوا ۱۰۰۰ کسانو ته پهکې په مستقیم او غیرمستقیمه توګه د کار زمینه هم برابره شوې ده.
د کانونو او پټرولیم وزارت سرپرست شهابالدین دلاور د دې څاګانو د پرانېستو مراسمو کې وویل، راتلونکی کال په پام کې لري چې د نفتو استخراج کچه په ورځ کې له ۸۰۰ څخه ۳۰۰۰ مترمکعب ته لوړه کړي.
دلاور زیاته کړه چې د اکتشافاتو «سپړنو» بهیر په بشپړېدو سره به افغانستان یوازې د قشقري نفتو حوزې څخه د کال پنځه میلیونه ډالر عواید ترلاسه کړي.
هغه وویل: «پنځه میلیونه ډالر یوازې د امو سند نفتي حوزې څخه د افغانستان بودیجې ته لوېږي او له بهرنیو شرکتونو مو غوښتنه دا ده چې افغانستان ته راشي او دلته پانګونه وکړي.»
نوموړي دې مراسمو کې همداراز وویل چې هرات کې یې د ۲۳زره کیلومټره مربع په مساحت سره د نفتو او ګازو قرارداد اعلان ته ورکړی او پر نړیوالو کمپنیو غږ وکړي چې دې برخه کې پانګونه وکړي.
د ریاستالوزرا اقتصادي مرستیال عبدالغني برادر بیا د یادو څاګانو پرانېستې مراسمو ته وویل چې د قشقري نفتو عوایدو څخه باید لومړی د یاد ولایت اوسېدونکي ګټه واخلي او په وینا یې، د سلطان ابراهیم بند هم له یادو عوایدو رغول کېږي.
هغه وویل: «لومړی باید د دې ولایت اړتیا براورده شي او خلکو ته عامالمنفعه خدمات وړاندې شي. ا.ا نورې پروژې هم ترلاسه لاندې لري او اوس هم ډېرې پروژې لرو چې په بنیادي او تدریجي ډول یې مخته وړو.»
بلخوا د افچین شرکت د معلوماتو له مخې دا مهال له ۱۷ څاګانو څخه د استخراج چارې روانې دي چې په ورځنۍ کچه د نفتو اسختراج له ۲۰۰ مترمکعب څخه ۸۰۰ مترمکعب ته لوړ شوی دی.
د کانونو او پټرولیم وزارت مسوولان په وینا، نږدې راتلونکې کې به له پنځو نورو څاګانو څخه هم د استخراج چارې پیل شي.