د ریاستالوزرا اقتصادي مرستیال ملا عبدالغني برادر نن (یکشنبه، د وري ۳) د کابل پغمان ولسوالۍ کې د ارغندې ترانسپورتي ترمینل د چارو د پيل پرانیسته وکړه.
هغه هېواد کې د ترانسپورتي زېربناوو د پراختیا په برخه کې د ارغندې ترانسپورتي ترمینل جوړول مهم وبلل او ویې ویل، د دغه ترانسپورتي ترمینل کې ۴۲ مهم تاسیسات جوړېږي.
ښاغلی برادر وايي، د ترانسپورتي زېربناوو معیاري رغول او پراخول د یو هېواد د اقتصادي ودې، پرمختګ او د داخلي او سیمهییز اتصال لپاره ډېر مهم او بنسټیز ګام ګڼل کېږي.
د ده په خبره، له بدهمرغه په هېواد کې د لسیزو جګړو او فساد له امله دې مهمې برخې ته پام نه دی شوی؛ بلکې دې برخه کې شته زېربنا د ټیټ کیفیت له امله تخریب شوې، عامه ملکیتونه د اشخاصو له لوري غصب او د لویو لارو او سړکونو حریمونه کوچني شوي دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د ریاستالوزرا اقتصادي مرستیال زیاتوي چې اسلامي امارت اوسنیو اړتیاوو ته په کتو نه یوازې د ترانسپورتي زېربناوو د رغولو او پراخولو په برخه کې کلک هوډ لري، بلکې د نورو بنسټیزو او ستراتیژیکو موخو د ترلاسه کولو په برخه کې هم هڅو ته دوام ورکوي.
هغه د دې پروژې له قراردادي شرکت وغوښتل چې په ښه کیفیت یې چارې په ټاکلي وخت کې بشپړې کړي.
د یادونې وړ ده چې د کابل ولایت د ارغندۍ ترانسپورټي ترمینل په شاوخوا ۹۰۰ جریبه ځمکه کې د یو میلیارد او ۲۸۵ میلیون افغانیو په لګښت جوړېږي چې چارې به یې د خصوصي سکټور له لوري په دوو کلونو کې بشپړې شي.
د دغه ترمینل په جوړېدو سره به ترانسپورټي اسانتیاوې زیاتې شي، د انتقال اړوند چارو په چټکتیا او غوره تنظیم کې به مهم رول ولوبوي، ترانسپورټي لګښتونه او ترافیکي ستونزې به کمې او ډېرو هېوادوالو ته به د کار زمینه هم برابره شي.
