د عامې روغتیا وزارت مسوولان هېواد کې د کورونا ویروس د مثبتو پېښو له ډېروالي خبر ورکوي.
د عامې روغتیا وزارت مسوولان سلاموطندار ته نن چهارشنبه د غويي ۱۷مه ویلي چې د تېرو ۱۸ ورځو پر مهال هېواد کې د کورونا ویروس ۳۰۰۰ مثبتې پېښې ثبت شوې دي.
د سلاموطندار پښتو فېسبوکپاڼه وڅارئ
د دغه وزارت ویاند شرافت زمان وویل: «د اپرېل میاشت کې لسو کسانو خپل ژوند له لاسه ورکړی او وروستۍ میاشت کې یعنی ۱۷ ورځو کې ۱۵کسان د یادې ناروغۍ له کبله مړه شوي دي.»
بلخوا د افغان-جاپان روغتون مسوولان بیا وايي چې د دغه روغتون د کوویډ-۱۹ وارډ ته هره ورځ نږدې ۸۰ کسان د کورونا د معایناتو لپاره ورځي.
د یاد روغتون د کووېډ-۱۹ څانګې اداري رییس حشمتالله غزنوي وايي، ډېری دغه کسان په دویم او درېیم ځل پر کورونا اخته شوي دي.
هغه وویل: «له اختر وروسته مو مراجعین ډېر شوي او ګڼشمېر هغه کسان دي چې یاد روغتون کې پخوا بستر شوي او د کورونا واکسین یې هم ترلاسه کړی چې دا وار د درېیم او دویم ځل لپاره بسترېږي.»
د افغان-جاپان روغتون ډاکټران وايي، د تېرو څو ورځو پر مهال هېواد کې د کورونا ناروغانو شمېر ډېر شوی او هره ورځ تر لسو ډېر کسان بسترېږي چې ډېری یې ښځې دي.
په ورته وخت کې د کورونا هغه ناروغان چې په افغان-جاپان روغتون کې تر درملنې لاندې دي، د دغه روغتون د درملنې او اسانتیاوو خوښ دي.
محمد زمان چې له پنځو ورځو راهیسې په دغه روغتون کې بستر دی وايي: «پر کورونا اخته شوی یم، وضعیت مې ښه دی او ښه رسېدنه راته کوي، له هر اړخه درمل او ډاکټران ښه دي او د روغتون له خدماتو راضي یم.»
د افغان-جاپان روغتون مسوولانو د شمېرو پر بنسټ، اوس په دغه روغتون کې د کورونا نږدې ۴۰ ناروغان بستر دي. د افغانستان د عامې روغتیا وزارت مسوولان بیا وايي، د یاد ویروس د پراختیا مخنیوي لپاره به هېواد کې د کورونا ضد واکسین کمپاین پیل کړي.