د مخابراتو او معلوماتي ټکنالوژۍ وزارت مسوولان وايي چې په هېواد کې یې د مخابراتي شبکو د سیمکارټونو پلور ۹۸سلنه قانوني کړی دی.
د یاد وزارت مسوولانو نن چهارشنبه د زمري اتلسمه د دغه وزارت د تېر یوه کال راپور وړاندې کولو پرمهال وویل چې هېواد کې یې په ناقانونه توګه د سیمکارټ د پلور مخه نیولې او دا مهال هېواد کې د سیمکارټونو پلور ۹۸سلنه قانوني شوی دی.
د سلاموطندار پښتو برخه دلته وڅارئ
د مخابراتو او معلوماتي ټکنالوژۍ وزارت سرپرست نجیبالله حقاني وویل چې په ناقانونه توګه د سیمکارټونو پلور ټولنه کې ګڼې ستونزې رامنځته کړې وې.
نوموړي وویل: «له دې وړاندې ناقانونو سیمکارټونو ټولنه کې ګڼې ستونزې رامنځته کړې وې چې خلک ځورول کېدل، له دې لارې غلاوې او جرمونه کېدل، اوس افغانستان کې د سیمکارټونو وېش ۹۷ تر ۹۸ سلنه قانوني شوی او تر کنټرول لاندې دی.»
دا په داسې مهال دی چې هېواد کې تل د مخابراتي شبکو له ټیټ کیفیت او لوړو بیو شکایتونه شوي دي، خو دغه وزارت بیا وايي، هڅه کوي چې دې ستونزو ته رسېدنه وکړي.