د ونزویلا ولسمشر نیکلاس مادورو د دغه هېواد ولسمشریزو ټاکنو په درشل کې د امریکا لهخوا د خبرو وړاندې شوې، طرحه منلې.
مادورو چې د درېیم ځل لپاره ولسمشریزو ټاکنو کې د بریالیتوب په لټه کې دی، له امریکا غوښتنه کړې چې پر دې هېواد لګول شوي بندیزونه لرې کړي.
د سلاموطندار پښتو فېسبوکپاڼه وڅارئ
نوموړی دغه بندیزونه د ده د حکومت ړنګولو لپاره بللي دي. مادورو په یوې ټلوېزیوني خپرونه کې له امریکا سره دغه مذاکرات بېړني وبلل.
مادورو پرون دوشنبه، جولای لومړۍ ویلي: «د دوو پرلهپسې میاشتو راهیسې امریکا د مذاکراتو او مستقیمو خبرو بیاپیل وړاندیز کوي، له دوو میاشتو فکر وروسته مې منلې دي.»
د نوموړي په وینا، د دغه هېواد او امریکا مذاکرات د دواړو لوریو ترمنځ قطر کې د شوي هوکړهلیک د عملي کولو لپاره دي او راتلونکې چهارشنبه به پیل شي.
د مادورو حکومت له دې وړاندې امریکا تورنه کړې چې د دې هوکړهلیک عملي کولو کې پاتې راغلې.
د ونزویلا ولسمشریزې ټاکنې د روانې جولای میاشتې په ۲۸مه کېږي چې د واکمن ګوند لپاره تر ټولو ستره ننګونه بلل کېږي. اوسنی سوسیالست ګوند له ۲۵کلونو راهیسې پر ونزویلا واکمن دی او هڅه به وکړي چې دې ټاکنو کې د شپږو راتلونکې کلونو لپاره خپل واک وساتي.
د ونزویلا ولسمشریزو ټاکنو کې د مادورو په ګډون لس کسان نوماندان دي، خو یوازې «ادموندو ګونزالس اروتیا» هغه نوماند دی چې اوسني ولسمشر نیکلاس مادورو ته ماته ورکولای شي.