بلخ کې د کورش لوبې یوشمېر لوبغاړي وايي، اړ دي چې له هېواده بهر سیالیو کې د ګډون لپاره «له دوه تر درې زره ډالره» لګښت ورکړي.
دوی سلاموطندار ته وايي چې دغه ولایت کې د حکومت له لوري د کورش لوبغاړو د ملاتړ او ویزو ورکړې د لګښت برخه کې هېڅ راز ملاتړ او همکاري شتون نهلري.
د سلاموطندار پښتو فېسبوکپاڼه وڅارئ
د افغانستان د کورش ملي لوبډلې غړي عباس عباسي سلاموطندار ته وویل: «موږ په ډېر زحمت سره ورزش کوو، خو له دې امله چې پیسې نهلرو، نشو کولای بهر ته د لوبو لپاره لاړ شو. موږ ته وايي چې د ویزې، تګراتګ او خوړو لګښت باید خپله ورکړئ.»
کمزوری اقتصاد، د ورزشي وسایلو کمښت او د تمرین لپاره د مناسب ځای نشتون نورې هغه ستونزې دي چې بلخ کې د کورش لوبې لوبغاړي ورسره مخ دي.
د بلخ د ورزش او تربیت بدني ریاست اړوند د ملي او دودیزو لوبو مسوول محمداصف عالمي دغه ولایت کې د کورش لوبغاړو ستونزې تاییدوي او وايي چې له تېر یوه کال راهیسې یادو لوبغاړو ته ځانګړي شوي امتیازونه هم نه دي ورکړل شوي.
په همدې حال کې پرون جمعه د چنګاښ ۲۳مه د بلخ مرکز مزارشریف ښار کې د کورش منتخبې لوبډلو ته د غوره لوبغاړو پېژندلو په موخه سیالۍ جوړې شوې وې.
یادو سیالیو کې د مرکز مزارشریف او د یاد ولایت ولسوالیو څخه شاوخوا ۱۰۰ ورزشکارانو ګډون کړی وو.
ټاکل شوې چې تر راتلونکو دوو میاشتو به له یادو سیالیو غوره شویو لوبغاړو ترمنځ د کورش ملي لوبډلې غړیتوب ترلاسه کولو لپاره سیالي وکړي.