د لوګر د سپورټ امریت چارواکي وایي، د بایسکل ځغلونې فدراسیون له لوري د کابل او لوګر ولایتونو ورزشکارانو ترمنځ د بایسکل ځغلونې یو ورځنۍ سیالۍ د کابل لوبډلې په اتلولۍ سره پای ته ورسېدې.
د لوګر د سپورت امریت مطبوعاتي مسوول مصطفی احمدي سلاموطندار ته ویلي، په دغه یوه ورځنۍ سیالۍ کې د کابل او لوګر ولایتونو شاوخوا ۴۰ ورزشکارانو ګډون کړی وو.
د سلاموطندار پښتو فېسبوکپاڼه وڅارئ
احمدي زیاته کړه چې یادو ورزشکارانو د کابل له المپیک ریاست څخه د محمداغې ولسوالي تر پُل کندهاري سیمې پورې ۷۰ کېلومتره د بایسکل ځغلوونې سیالۍ کړې چې په پایله کې کابل ورزشکارانو وکولای شول چې د یادو سیالیو اتلولي خپله کړي.
د نوموړي په وینا، له یادو سیالیو څخه یې موخه د بایسکل ځغلوونې ورزش ته وده ورکول او د ورزشکارانو ترمنځ ښې اړیکې رامنځته کول دي. بلخوا د بایسکل ځغلوونې ورزش لوبغاړي وایي، خوښ دي چې لوګر کې یې د بایسکل ځغلوونې یوه ورځنۍ سیالۍ کې یې ګډون کړی دی.
باید وویل شي چې تېر کال هم د لوګر د اطلاعاتو او فرهنګ ریاست له لوري د پنځه ولایتونو ترمنځ د بایسکل ځغلوونې یوه ورځنۍ سیالۍ جوړې شوې وې.