د اسراییلو پوځ اعلان کړی چې (د زمري ۳۱مه / ۲۲ اګست) له یمن څخه د یوه توغندي په توغولو سره په څو سیمو کې د خطر زنګونه او دفاعي سېسټمونه فعال شوي دي.
د پوځ په خپره شوې خبرپاڼه کې راغلي: «له یمن څخه د توغندي د توغولو وروسته د اسرائیل په بېلابېلو سیمو کې د خطر اژیرونه فعال شول.» پوځ زیاته کړې چې دغه توغندی شنډ شوی او لاهم د پایلو ارزونه روانه ده.
په راپورونو کې ویل شوي چې د توغندي څو ټوټې د مرکزي اسراییل په ځینو سیمو کې لوېدلې دي. د پېښې په تعقیب د تلابیب په ګډون ګڼو سیمو کې اژیرونه په پرلهپسې ډول غږېدلي دي.
د اسرائیلي رسنیو د راپورونو له مخې، د تلابیب نږدې د «بنګوریون» نړیوال هوايي ډګر هوايي حریم هم د لنډ وخت لپاره تړل شوی دی.
د بیړني خدمتونو ادارې اعلان کړی چې د خلکو د پناه ځایونو ته د تګ پرمهال د ګډوډۍ له امله یوشمېر کسان ټپې شوي دي، خو شمېر یې نه دی ورکړی.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
دا پېښه څو ساعته وروسته هغه مهال رامنځته شوه چې اسرائیلي پوځ د یمن له لوري د یوې الوتکې د څار خبر ورکړ، کوم چې غزې ته څېرمه ښارګوټو کې د خطر اژیرونو فعالېدو لامل شوی و.
د حوثي ډله چې د ایران له ملاتړ برخمنه ده، پر اسرائیل د توغندیو او بېپیلوټه الوتکو بریدونه کوي او همدارنګه هغه بېړۍ په نښه کوي چې د اسرائیل سره تړلې ګڼي یا د هغه پر لور روانې وي.
اسرائیل هم د یمن په هغو سیمو کې د حوثیانو پر مرکزونو هوايي بریدونه کوي چې د دوی تر واک لاندې دي.