د ملګروملتونو سرمنشي انټونیو ګوټرېش د یاد سازمان په کلنۍ غونډه کې ویلي چې ۷۰سلنه افغانان بشردوستانه مرستو ته اړتیا لري.
د ګوټرېش یادو څرګندونو سره هممهاله یوشمېر افغانان هم وايي چې د بېوزلي او اقتصادي ستونزو له امله د یوه وخت خواړه نشي برابرولی.
د سلاموطندار پښتو فېسبوکپاڼه وڅارئ
د کابل ښار اوسېدونکی سیفالرحمن چې هره ورځ د سړک تر غاړې د خلکو بوټان رنګوي، وايي چې په ورځني عاید نشي کولای، د خپلې کورنۍ اړتیاوې برابرې کړي.
هغه وویل: «ډېری وخت په لوږه ویده کېږو او دوه ورځې کېږي چې کار مې نه دی کړی. له ورځني کار عاید نهلرم او حتا د یوه کیلوګاز پیسې هم نهلرم چې خواړه پرې پاخه کړو، نور لګښت خو پر ځای پرېږده.»
په ورته مهال یو بل کارګر نعیم هم وايي چې هره ورځ له سهار تر ماښامه له کوره د کار پر لټون راوځي، خو په وینا یې، که بخت یې ښه وي، اوونۍ کې یوازې دوه ورځې کار ورته پیدا کېږي.
نوموړي وویل: «پخوا مو مرستې ترلاسه کولې او ښه به مو پرې کېدله، بېغمه وو، خو اوس نشته او کمې دي او موږ د بشردوستانه مرستو د دوام غوښتنه کوو.»
په ورته مهال د خوړو نړیوال پروګرام هم خبرداری ورکړی که د اړتیا وړ بودیجه ورته برابره نهشي له افغانستانه به ووځي. د خوړو نړیوال پروګرام اړمنو افغانانو ته د مرستو رسولو لپاره راتلونکو شپږو میاشتو کې یو میلیارډ ډالرو ته اړتیا لري.
په همدې حال کې د اقتصاد وزارت مسوولان سلاموطندار ته وايي چې هېواد کې د اړمنو وضعیت ته په کتو دې بشردوستانه مرستې دوام وکړي.
د یاد وزارت عبدالرحمن حبیب سلاموطندار ته وویل: «ټول وزارتخونې د خلکو وضعیت ښهوالي او کاري فرصتونو رامنځته کولو ته لومړیتوب لري او یاد وزارتونه بېړنیو شرایطو ته د رسېدو لپاره خپل چمتووالی لري.»
له دې وړاندې یونېسف هم ویلي و چې روان ۲۰۲۳ کال افغانستان کې د اړمنو کسانو شمېر ۲۹،۲ ته لوړ شوی دی.