د زابل د ټرافیک مدیریت له لوري دغه ولایت کې یو «کیلي» یا ښي لاسو موټرو ته د موقت جوازسیر او نمبرپلېټ د وېش لړۍ پیل شوه.
د زابل د ټرافیک پولیسو مدیر عصمتالله عبید وايي چې دغه ولایت کې یې د یوکیلي یا ښي لاسو موټرو د ثبت بهیر پر مهال ۶۵۰۰ موټر ثبت کړي وو چې په وینا یې، اوس ورته درې کلن اسناد ورکوي.
د سلاموطندار پښتو فېسبوکپاڼه وڅارئ
په ورته مهال عبید زیاته کړه چې دغه موټر د یاد ولایت د ټرافیکو مدیریت له لوري لومړی ثبت او وروسته یې موټرچلوونکي بایومټریک شوي دي.
د زابل د ټرافیک پولیسو مدیر عصمتالله عبید د یاد ولایت د یوکیلي موټرو، چلوونکو څخه چې مخکې یې سټېکر ترلاسه کړی، غوښتنه وکړه چې خپلو موټرو ته اسناد واخلي.
د نوموړي په وینا، د دې اسنادو ترلاسه کولو وروسته موټرچلوونکي کولای شي چې د هېواد هر ولایت او سیمې ته په قانوني توګه تګراتګ وکړي.
دا په داسې مهال دی چې لاهم د هېواد په ډېری ولایتونو او ښارونو کې ښيلاسي یا یوکیلي موټر تګراتګ کوي چې د مسوولانو په وینا، ډېری ټرافیکي پېښې هم د همدې موټرو د موټرچلوونکو له لوري رامنځته کېږي.