د ملګروملتونو سرمنشي، د انتونیو ګوترېش له متحده ایالات او اسراییل وغوښتل چې له ایران سره روان کړکېچ ته د پراخېدو مخکې د پای ټکی کېږدي، او خبرداری یې ورکړ چې دا جګړه کېدای شي «له کنټروله ووځي» او جدي ناوریني پایلې ولري.
د ملګروملتونو سازمان په منځني ختیځ کې د جګړې او روان کړکېچ د کمېدو لپاره له ښکېلو اړخونو غوښتنه کړې چې د وضعیت د بدلون لپاره د خبرو لار غوره کړي.
د اوکراین ولسمشر ولودېمېر زېلېنسکي ویلي چې د منځني ختیځ او خلیج په سیمو کې د ایراني بېپيلوټه الوتکو «شاهد» پر ضد د دفاع لپاره د اوکراین ۲۰۰ څخه زیات پوځي کارپوهان فعالیت کوي.
د ایران د پارلمان رییس محمدباقر قالیباف ویلي چې د سیمې امنیت باید د سیمې د هیوادونو له لوري تامین شي او د امریکا نظامي حضور په منځني ختیځ کې امنیت نشي راوستلی.
د اسراییلو د روغتیا وزارت اعلان کړی چې له ایران سره د جګړې له پیل راهیسې تراوسه پورې ۳زره او ۵۳۰ کسان ټپیان شوي دي.
د یاد وزارت په وینا، یوازې په تېرو ۲۴ ساعتونو کې له ۷۰ څخه زیات کسان د ایران د بریدونو له امله روغتونونو ته انتقال او بستر شوي دي.
د اسراییلو پوځ اعلان کړی چې د دوی ۹۱مې لېوا د لبنان په سوېلي سیمو کې ځمکنۍ پوځي عملیات پیل کړي، څو د دوی په وینا «مخکینۍ دفاعي ساحه» پراخه کړي.
د سعودي عربستان د دفاع وزارت اعلان کړی چې د هېواد په ختیځو سیمو کې یې د بېپیلوټه الوتکو درې جلا څپې شنډې کړې دي.
ګوترېش نن یکشنبه، د مارچ ۱۵مه، د « د اسلامفوبیا یا اسلام څخه د کرکې پر وړاندې د مبارزې نړیواله ورځې» په مناسبت په خپل پیغام کې ټینګار کړی چې مسلمانان په ډېرو ځایونو کې له ټولنیز او اقتصادي محرومیت، تعصب او ناعادلانه مهاجرتي پالیسیو سره مخ دي.
د روسیې چارواکي وایي چې د دغه هېواد د هوايي دفاعي سیستمونو د مسکو پر لور روانې لسګونه اوکرایني بېپیلوټه الوتکې (ډرونونه) شنډې کړې دي.
د مسکو ښاروال سرګي سوبیانین په ټیلیګرام کې لیکلي چې د روسیې هوايي دفاعي واحدونو د ورځې په اوږدو کې ټول ۶۵ ډرونونه نسکور کړي چې د مسکو پر لور روان وو.
د ایران د اسلامي انقلاب ځواک ګواښ کړی چې د اسراییلو د لومړي وزیر بنیامین نتنیاهو د وژلو لپاره به خپلې ټولې هڅې وکړي.
د ایران د اسلامي انقلاب ځواک (IRGC) ویلي چې اسراییل، عراق او کوېټ کې د امریکا پر درېیوو پوځي اډو یې بریدونه کړي دي. د
د حزبالله په وینا، د اسراییلي ځواکونو پر یوې ډلې یې د «کالف هیل» په نوم سیمه کې چې د کفر یووال مېشتځای شمال ته موقعیت لري، راکټي برید کړی دی. دغه ډله وایي چې هدف یې د اسراییلي پوځ هغه سرتېري وو چې په یاد ځای کې ځای پر ځای شوي وو.
سعودي عربستان وايي چې د پلازمېنې ریاض او د هېواد د ختیځو سیمو شاوخوا لس بېپیلوټه الوتکې (ډرونونه) یې شنډې کړې دي. د سعودي چارواکو په وینا، دغه ډرونونه د هوايي دفاعي سیستمونو له لوري لهمنځه وړل شوي او د احتمالي زیان مخه نیول شوې ده.
د ایران د پوځ عمومي قومندان امیر حاتمي خبرداری ورکړی چې د هند سمندر کې د دغه هېواد پر یوې جنګي بېړۍ شوی مرګونی برید به بېځوابه پاتې نهشي.
د فلسطیني روغتیايي سرچینو په وینا، د اسراییلو په هوايي او توپچي بریدونو پرمهال په غزه کې څلور کسان وژل شوي چې پهکې دوه ۱۷کلن ځوانان هم شامل دي.
دغه بریدونه په داسې حال کې شوي چې په غزه او لوېدیځه غاړه کې تاوتریخوالی دوام لري او اسراییل خپل پوځي عملیات پراخ کړي دي.
د عراق حکومتي چارواکو ویلي چې بغداد کې د امریکا سفارت باندې توغندیز برید شوی دی.
چارواکي وايي تراوسه دا روښانه نه ده چې په دې برید کې د مرګژوبلې او یا هم د زیان اندازه څومره ده. د پېښې د جزییاتو د معلومولو لپاره څېړنې روانې دي.
