د تولګټو وزارت مسوولان وايي چې د سالنګ لویه لاره د واورې ورښت او توپان له امله د هر ډول موټرو د تګراتګ پرمخ تړل شوې.
د یاد وزارت ویاند محمداشرف حقشناس نن یکشنبه، مرغومې ۳۰مه سلاموطندار ته وویل چې دا مهال سالنګونو کې واوره او توپان روان دی او د سهار له درېوو بجو لاره تړل شوې.
د کندهار ورزشي جمنازیوم کې د «کندهاري فوټسالرانو جام» په نوم د پیل شویو سیالیو اتلولي، د ابراهیمي لوبډلې په بریا پای ته ورسېدې.
یادې لوبې درې میاشتې وړاندې پیل شوې وې چې ۸۰ لوبډلو پهکې ګډون کړی وو.
د روزګان په ګېزاب ولسوالي کې د ۲۹ میلیونه افغانیو په لګښت جوړ شوی پُل ګټېاخیستنې ته سپارل شوی دی.
د روزګان د ټولګټو رییس مولوي ادم خان نعماني وایي، دغه پُل ۱۱۰ متره اوږدوالی او ۹.۴ متره پلنوالی لري او په وینا یې، د دې پروژې بشپړېدل، د دواړو ولایتونو لپاره یو مهم پرمختګ دی.
د غور محلي مسوولان وايي چې د بېګاه شپې واورې ورښت له امله د غور-کابل او غور-هرات لویې لارې د ټرافیک پرمخ وتړل شوې.
د یاد ولایت د ټولګټو رییس عبدالکریم ابوشعیب وايي: «د غور-کابل لویه لاره د بامیان د بکک بند سیمه او د غور-هرات لویه لاره د بېګاه شپې سختې واورې له امله د هر ډول تګراتګ پرمخ تړل شوې.»
د هلمند امنیتي مسوولان وايي چې د یاد ولایت په بېلابېلو ولسوالیو کې د تېرې یوې اوونۍ پرمهال زرګونه کیلوګرامه نشهيي توکي نیول شوي او لهمنځه وړل شوي دي.
د دوی په وینا، یاد نشهيي توکي د بهرامچې، ګرشک، سنګین، باغران او خانشین ولسوالیو کې د ځانګړو عملیاتو پرمهال نیول شوي دي.
د بهرنيو چارو وزارت سیاسي مرستيال شېرمحمد عباس ستانکزی وايي چې د سرپرست حکومت مشران دې هېواد کې د ټولو پرمخ د زدهکړو دروازې پرانیزي.
نوموړي دغه څرګندونې شنبه، مرغومې ۲۹مه خوست کې د دستاربندۍ مراسمو کې د وینا پرمهال کړې دي.
بدل ودونه هغه ودونه دي چې دوه کورنۍ خپلې لوڼې یو د بل ځامنو ته په بدل ورکوي. که څه هم دغه ډول ودونه د واده او ولور راکمولو په موخه کېږي، خو یوولسو ښځو چې په دغه راپور کې ورسره مرکې شوي، ویلي چې د بدل ودونه د ښځو د ګډ ژوند لپاره ډېرې بدې پایلې لري.
په افغانستان کې د ملګرو ملتونو د ماشومانو د ملاتړ صندوق یا یونیسف استازی تاجالدین ایو وال وايي، د اوبو ناورین د افغان ماشومانو ژوند ګواښي.
نوموړي پرون د مرغومي ۲۸مه، د جمعې ورځ پر اېکس لیکلي، په روان زېږدیز کال کې باید د افغانانو، په تېره د افغان ماشومانو د ملاتړ په موخه د اوبو ناورین پر وړاندې مبارزه چټکه شي.
د سرپرست حکومت د ټرانسپورټ او هوايي چلند وزارت وايي، په کابل ښار کې یې د ۳۰ مسافروړونکو موټرو پر فعالیت بندیز لګولی دی. دغه وزارت نن په یوه خبرپاڼه کې چې پر اېکس یې خپره کړې، لیکلي چې د دغو موټرو فعالیت یې د تخنیکي ستونزو او د څوکیو زیاتوالي له کبله درولی دی.
د افغانستان بانک وايي، د «افغانۍ» د ارزښت ساتلو او ثبات لپاره به سبا ۱۸ میلیونه امریکايي ډالر د داوطلبۍ له لارې لیلام کړي.
د دغه بانک له هغو ټولو بانکونو، د صرافۍ او پولي خدمتونو له شرکتونو څخه چې پر شرایطو برابر دي، غوښتي چې په یاده داوطلبۍ کې ګډون وکړي.
فراه کې د «کیمیاوي مبلایلو» شرکت مسوولان وايي چې یاد شرکت د ورځې ۱۲ ټُنه مبلایل تولیدوي.
د یاد شرکت رییس زلمی نورزی وايي چې د یاد شرکت تولید شوي مبلایل د هېواد ټولو ولایتونو ته لېږدول کېږي.
د هلمند په نوزاد ولسوالي کې د ۲۱۷۰۰۰ ډالرو په لګښت د درې چکډېمونو چارې بشپړې شوې.
د چارواکو په وینا، د دې چکډېمونو د جوړېدو چارې د ولایت مقام، اقتصاد ریاست، د پېښو پر وړاندې مبارزې ریاست، ډيارسي موسسې او ډنمارک کمېټې په ګډو مالي هڅو بشپړې شوې دي.
د ملګروملتونو د بشري مرستو د همغږۍ ادارې اوچا وايي چې د تېرو ۱۵ ورځو پرمهال افغانستان کې د سړې هوا له امله ۱۰ کسانو خپل ژوند له لاسه ورکړی دی.
اوچا په یوه خپور کړي راپور کې ویلي چې تېرو دوو اوونیو کې د افغانستان په کونړ، لغمان، نورستان، فاریاب او بغلان ولایتونو کې د سختو واورو او یخنۍ له امله ۱۰ کسان مړه شوي دي.
خوست کې د تېرو دوو ورځو پرمهال ۱۳ کسان د بېلابېلو جرمونو په تور نیول شوي دي.
د خوست امنیه قومنداني څخه په خپره شوې خبرپاڼه کې ويل شوي چې د دويمې امنيتي حوزې ځواکونو ۱۳ کسان د بېلابېل جرمونو په تور نيولي دي.
د هرات محلي مسوولان وايي چې دغه ولایت کې د تېرو نهو میاشتو پرمهال ۱۶۵ کوچنیو او لویو کارخونو په فعالیت پیل کړی دی.
د هرات د والي ویاند محمدیوسف سعیدي وايي، یادې کارخونې د غذايي توکو، ودانیزو محصولاتو، کیمیاوي توکو او نورو برخو کې تولیدات کوي.
د افغانستان لپاره د ملګروملتونو د اقلیمي بدلون یا کاپ۲۹ نړیوالې غونډې د پایلو ارزولو په موخه د اقلیمي بدلون یو ورځنی ملي کنفرانس نن چهارشنبه، مرغومې ۲۶مه» کابل کې جوړ شو. هغه له نړیوالې ټولنې وغوښتل چې د اقلیمي بدلون د اغېزو کمولو په برخه کې افغانستان سره همکاري وکړي.
