د ملګرو ملتونو سرمنشي انټونیو ګوټرېش ویلي چې په روان میلادي کال کې د نړۍ په بېلابېلو هېوادونو کې څه باندې ۷۰ خبریالان د خپلې دندې له امله وژل شوي دي.
ګوټرېش نن چهارشنبه د لړم یوولسمه د خبریالانو پر وړاندې د جرمونو د معافیت پای ته رسېدو نړیوالې ورځې په مناسبت پر خپله ټوېټرپاڼه لیکلي چې د خبریالانو د وژنې ډېری پېښې نه دي څېړل شوي.
د ملګرو ملتونو سرمنشي لیکلي: «باید د جرمونو پر وړاندې د معافیت فرهنګ ته د پای ټکی کېښودل شي او خبریالانو ته د دې زمینه برابرو کړو چې خپل اساسي کارونه ترسره کړي.»
سلاموطندار پر ټویټر هم وڅارئ
افغانستان د خبریالانو لپاره د نړۍ یو له ناامن هېوادونو څخه شمېرل کېږي. د اسلامي امارت له واکمنېدو راهیسې که څه هم د خبریالانو او د رسنیو د کارکوونکو د وژنې پېښې راکمې شوي، خو اسلامي امارت بیا د خبریالانو او رسنیو پر وړاندې یوشمېر محدودیتونه هم لګولي دي.
