امریکايي ځواکونو په سوریه او عراق کې د ایران انقلابي ګارډ «IRGC» او د دغه هېواد له ملاتړه برخمنو وسلهوالو ډلو پر مرکزونو هوايي بریدونه کړې دي.
رویټرز خبري اژانس نن «یکشنبه فبرورۍ څلورمه» راپور ورکړی چې یادو هېوادونو کې د ایران سپاه پاسداران او ایراني پلو ډلو پر ۸۵ اهدافو بریدونه شوې دي.
دغه بریدونه چې غچاخیستونکي بلل شوي، تراوسه د نږدې ۴۰ کسانو د وژنې پخلی پهکې شوې دی.
له هغه وخت راهیسې چې د ایران له ملاتړه برخمنې یوې وسلهوالې ډلې اردن کې د امریکا پر یوې اډې برید وکړ، دا لومړی ځل دی چې امریکا یې په ځواب کې هوايي بریدونه کوي.
څه باندې یوه اوونۍ وړاندې اردن کې د امریکايي ځواکونو پر اډې د وسلهوالو برید کې درې امریکايي سرتېري ووژل شول او شاوخوا ۲۵ نور ټپیان شوي وو.
د رویټرز خبري اژانس په راپور کې همداراز ویل شوي چې ښايي راتلونکو ورځو کې ورته بریدونه نور هم زیات شي، خو ایران بیا دا بریدونه د امریکا تېروتنه بللې.
د ایران د بهرنیو چارو وزارت ویاند ناصر کنعاني په دې اړه ویلي: «دا بریدونه د امریکا یوه بله لویه او ستراتیژیکه تېروتنه ده چې پایله به یې یوازې د کړکېچ او بېثباتۍ لامل شي.»
عراق کې د یاد برید له امله د امریکا سفیر احضار شوی او په دې اړه یې ورته رسمي شکایت کړی دی. د عراق د بهرنیو چارو وزارت په یوه بیان کې ویلي: «عراق یو ځل بیا دا تکراروي چې نهغواړي ځمکه یې د قدرتونو او هېوادونو د جګړې مرکز وي او هېوادونه دلته حساب او کتاب وکړي او خپل ځواک نندارې وړاندې کړي.»
د عراق حشدالعشبي ډله چې د ایران ملاتړ له ځان سره لري، په د امریکايي ځواکونو په بریدونو کې د خپلو ۱۶ وسلهوالو د وژنې پخلی کوي.
بلخوا سوریه کې هم ۲۳ کسان د امریکايي ځواکونو په هوايي بریدونو کې وژل شوې دي.
سلاموطندار پر ټویټر هم وڅارئ
له دې بریدونو سره سره د امریکا د دفاع وزارت «پنټاګون» په یوې خبرپاڼه کې ویلي، نه غواړي ایران سره په جګړه کې ښکېل شي او په وینا یې، دوی باور لري چې ایران هم جګړه نهغواړي.