د سمنګان د کرنې ریاست مسوولان وايي چې دغه ولایت کې د تېرکال په پرتله سږکال د بادام حاصلات ۲۰سلنه زیات شوې دي.
د کرنې ریاست د کرنیزو چارو امر عبدالخلیل کریمي وايي، د یاد ولایت د مرکز، حضرتسلطان، خُرم او سارباغ ولسوالیو بڼوالو سږکال ۲۲۸۰ ټُنه بادام راټول کړې دي.
د سلاموطندار پښتو فېسبوکپاڼه وڅارئ
د نوموړي په وینا، تېرکال مرکز او یادو دوو ولسوالیو کې د ۱۸۲۴ ټُنه بادامو حاصلات ټول شوي وو چې د سږني کال راټول شوي بادامو شمېر ۲۰سلنه زیاتوالی ښيي.
د کرنې ریاست د کرنیزو چارو امر عبدالخلیل کریمي په وینا، دغه ولایت کې پر ۵۱۲۴ هکټاره ځمکه د بادام باغونه شتون لري چې هر کال د اقلیمي بدلون له کبله یې، ونو ته زیانونه اوښتي دي.
سمنګان هېواد کې د بادامو د بېلابېلو ډولونو له امله خورا مشهور دی چې «ستاربایی، شکوربایی، قمبري، خیرالدیني، سوهاني، عبدالواحدي، مروجه او نور یې، د خوند او کیفیت له اړخه ډېر مینهوال لري.