د پاکستان د سوداګرۍ وزارت ويلي چې افغانستان ته ۱۷ قلمه توکي په پاکستانۍ کلدارو صادرېدلی شي.
د پاکستان د بهرنیو چارو وزارت په وینا، په دغو صادراتي توکو کې چرګان او محصولات یې، غوښه، سمنټ، درمل، مېوې، سبزیجات، مالګه، وریجې او د جراحۍ وسایل شامل دي.
په کابل کې د پاکستان سفیر منصور احمد خان ویلي، دا پرېکړه د دې لپاره شو چې د دغه هېواد صادرات د ډالرو د کمښت تر اغېز لاندې رانه شي.
احمدخان د پاکستان د دغه اقتصادي سیاست موخه د دواړو هېوادونو ترمنځ د صادراتو زیاتوالی بللی دی.
دا په داسې حال کې ده چې اوسمهال په هېواد کې د بهرنیو اسعارو پر استفادې بندیز لګېدلی دی.
