د غزني محلي مسوولان وايي چې نن «پنجشنبه، کب درېیمه» دغه ولایت کې یې پر دوو کسانو د قصاص حکم جاري کړی دی.
دغه دوه کسان چې د غزني د اندړو ولسوالي او د میدانوردګ د لونهيي سیمې اوسېدونکي وو، دو کاله وړاندې د وژنې «قتل» په تور نیول شوي وو.
د سلاموطندار پښتو فېسبوکپاڼه وڅارئ
پر یادو کسانو نن شاوخوا ۱۲:۳۰ بجې د ا.ا د مشر فرمان پر بنسټ، د غزني ښار «دشت علي لالا» سیمې د فوټبال لوبغالي کې اجرا شوی دی. دغه دوه کسان په ډزو ویشتل شوي او قصاص پرې جاري شوی.
د غزني والي محمدامین جان عملي د دغو دوو کسانو د قصاص پر مهال وویل چې د وژل شویو کسانو کورنیو د ا.ا او قاتلینو عذر او ننواتی ونهمانه او د قصاص غوښتنه یې کوله.
د چارواکو په وینا، د قصاص حکم د سرپرست حکومت د یوشمېر چارواکو او د غزني د سلګونه اوسېدونکو په شتون کې جاري شوی دی.
هغه کسان چې د قصاص حکم پرې جاري شوی، سیدجمال او ګلخان نومېږي چې یو یې د غزني د اندړ او بل یې د میدانوردګ اوسېدونکي وو.
یادو کسانو دوه کاله وړاندې د امیرمحمد او محمدقسیم په نومونو دوه کسان په جلا جلا پېښو کې وژلي وو او د ځینو نورو کسانو پر وژنه هم تورن وو.