د کورنیو چارو وزارت افغانستان کې د تریاکو کښت او تولید زیاتوالي په اړه د ملګروملتونو راپور رد کړی او هغه یې، له «واقعیت لرې» بللی دی.
د یاد وزارت ویاند عبدالمتین قانع پر خپله اېکسپاڼه لیکلي چې افغانستان کې د تېر یوه کال پرمهال د تریاکو کښت او تولید راکم شوی دی.
د سلاموطندار پښتو فېسبوکپاڼه وڅارئ
په خبرپاڼه کې ویل شوي: «نشهيي توکي ویجاړونکی بوټی دی او د اسلام دین له نظره حرام دی؛ اسلامي امارت دې امر ته په پام او د مشرتابه د فرمان پر بنسټ، دې پدیدې پروړاندې مبارزه د خپلو کارونو په لومړیتوبونو کې لري.»
له نشهيي توکو او جرمونو سره د ملګروملتونو دفتر چهارشنبه، لیندۍ اوومه په یوه راپور کې ویلي چې تېرکال ته په کتو افغانستان کې د تریاکو کښت ۳۰سلنه لوړ شوی دی.
د دې بنسټ د راپور له مخې، روان کال افغانستان کې ۴۳۳ ټُنه تریاک تولید شوي چې ارزښت یې، شاوخوا ۲۶۰ میلیونه ډالره اټکل شوی دی.
واک ته د اسلامي امارت له رسېدو وروسته افغانستان کې د تریاکو کښت، تولید او خرڅلاو بند شوی او ادعا کوي چې دا مهال هېواد کې د نشهيي توکو کښت او تولید تېرو شلو کلونو ته په پام ډېر کم شوی دی.