د اوبو او انرژۍ وزارت سرپرست عبداللطیف منصور چین کې د یوه کمربند او یوې لارې د غړیو هېوادونو د وزیرانو په درېیمه غونډه کې ویلي چې دغه لویه پروژه کولای شي، د افغانستان او چین ترمنځ د سوداګرۍ او انرژۍ د صادراتو ساحه پراخه کړي.
هغه زیاته کړه چې د یوه کمربند او یوې لارې نوښت افغانستان د یو مهم شریک په توګه دی چې دغه هېواد له اروپا سره نښلوي.
د سلاموطندار پښتو فېسبوکپاڼه وڅارئ
د اوبو او برښنا وزارت سرپرست په دې غونډه کې د خپلې وینا په یوه برخه کې وویل: «موږ باور لرو چې برېښنا ته د باور وړ لاسرسی، د انرژۍ امنیت او د انرژۍ په رسولو کې توازن د افغانستان د اقتصادي او ټولنیز پرمختګ بنسټیز شرایط دي.»
په همدې حال کې د اقتصادي چارو کارپوهان هم وايي چې افغانستان دا مهال د یو کمربند او یوې لارې له پروژې سره د وصل کېدو لپاره لازم ظرفیتونه لري او که له دغې پروژې سره وصل شي د هېواد اقتصاد به لا وده وکړي.
د اقتصادي چارو کارپوه ایرج فقیري وویل: «د افغانستان اوسني اقتصادي وضعیت ته په کتو، موږ د افغانستان له جغرافيايي موقعيت څخه په استفادې د ترانزيټي لارو په توګه مرستو ته اړتيا لرو، څو په هېواد کې د توکو او ملي سرچينو د صادراتو او د کار پيداکولو په برخه کې مرسته وکړو چې په دا ډول پروژو کې د افغانستان شريکېدل، ګټور دي.»
تر دې وړاندې د سوداګرۍ او صنايعو وزارت سرپرست هم چين ته د خپل سفر پر مهال ويلي و، چې افغانستان هڅه کوي د يو کمربند او يوې لارې په نوښت کې د افغانستان د شاملېدو لپاره د هېوادونو په ځانګړې توګه د چين رضايت ترلاسه کړي.