د روزګان محلي مسوولان وايي چې دغه ولایت کې یوې مېرمنې خپل ورور د توپانچې په وسیله وژلی دی.
پېښه تېره ورځ د یاد ولایت د دهراود ولسوالي بازار سیمه کې رامنځته شوې او لامل یې هم، د ښځې لهخوا له خپل ورور د خاوند غچ اخیستل بلل شوي دي.
د روزګان امنيه قومنداني وياند بلال روزګانی سلاموطندار ته وايي چي د يادې ښځې خاوند څه موده مخکې د همدې کس لهخوا وژل شوی و.
د نوموړي په وینا، یادې مېرمنې د خپل خاوند د غچ اخیستلو په پار خپل ورور وژلی دی. «ښځه د امنيتي مسوولانو لهخوا نيول شوې او عدلي او قضايي ارګانونو ته سپارل شوې ده.»
دغه پېښه داسې مهال رامنځته کېږي چې له دې وړاندې هم دغه ولایت او د هېواد په نورو ولایتونو کې د کورني تاوتریخوالي له امله ورته پېښې رامنځته شوې دي.