د پوهنې وزارت مسوولان وايي چې افغانستان کې له شپږم ټولګي پورته د نجونو زدهکوونکو ښوونځي تر امرثاني تړل شوې دي.
دغه څرګندونې د یاد وزارت مسوولانو نن چهارشنبه، وږي ۲۱مه کابل کې د خپلو یوکلنو لاستهراوړنو د تشرېح پروګرام کې وکړې.
د سلاموطندار پښتو فېسبوکپاڼه وڅارئ
د پوهنې وزارت ویاند منصوراحمد حمزه په دغه ناسته کې وویل چې له شپږم ټولګي پورته د نجونو ښوونځیو په اړه د سرپرست حکومت مرکزي ویاند په وار وار ځواب ورکړی او په وینا یې، دغه ښوونځي تر امرثاني تړلي دي.
د یاد وزارت د مسوولانو په وینا، دا مهال د هېواد په خصوصي او دولتي ښوونځیو کې څه باندې لس میلیونه زدهکوونکي پر زدهکړو بوخت دي.
د پوهنې وزارت د معلوماتو له مخې، د هېواد په کچه ۱۰۶ دولتي او ۲۱۰ خصوصي ښوونځي نوي جوړ شوي او د دولتي او خصوصي ښوونځیو ټولیز شمېر ۱۸زره او ۳۳۷ ته رسېږي.
همدارنګه ۱۲۳ ښوونځي او ۱۵۹ محلي ټولګي د کوچیانو ماشومانو ته ځانګړي شوي چې اوس ۴۱زره او ۸۲۴ زدهکوونکي پهکې پر زدهکړو بوخت دي.
د هېواد په ۱۸ ولایتونو کې ۴۸۴ معلولو ماشومانو ته د ځانګړو زدهکړو ښوونیزو مرکزونو کې د زدهکړې زمینه برابره شوې او په ۱۹ ولایتونو کې ۳زره او ۸۴۴ معلولو زدهکوونکو ته درسي وسایل او امکانات برابر شوي دي.
د پوهنې وزارت د مسوولانو د معلوماتو پر بنسټ، د دولسم ټولګي فارغانو ته ۳۰۳زره شهادتنامې وېشل شوي او د فارغانو دوه میلیونه او ۹۰۰زره قطعې نتایج په الکترونیکي سيستم کې ثبت شوي دي.
دغهراز په ښوونیزو بنسټونو کې د ازموینو کیفیت د ښهوالي په موخه، د معیاري ازموینو بورډ او د معیاري پوښتنو بانک رامنځته کول، د پوهنې قانون د مسودې چمتو کول، د مدرسو د تاسیس او د جهادي مدرسو رامنځته کولو د قوانینو نافذول؛ په تېرکال کې د دغه وزارت له نورو اقداماتو څخه دي.