د ماشومانو د خوندیتوب سازمان (Save the children) ویلي چې د روان کال په لومړیو شپږو میاشتو کې لږترلږه ۳۸ زره افغانان چې له نیمايي ډېر یې ماشومان دي، د اقلیمي بدلونونو له کبله بېځایه شوي دي.
د سلاموطندار پښتو فېسبوکپاڼه وڅارئ
دغه سازمان نن (د زمري ۱۶مه، سهشنبه) پر خپلې وېبپاڼې یو راپور خپور کړی چې پهکې لیکل شوي، سږ کال په افغانستان کې د تېر هغه په پرتله د بېځایه شویو کسانو شمېر زیات شوی دی.
د ماشومانو د خوندیتوب سازمان په راپور کې لیکل شوي چې وچکالي، د هوا د تودوخې درجې لوړېدل، ځمکښویېدنه او توپان د بېځایه کېدو اصلي لاملونه دي.
په دغه راپور کې زیاته شوې: «وچکالۍ د افغانستان په سوېل کې کندهار ولایت سخت ځپلی او خلک د سلګونو څاهګانو او د اوبو نورو سرچینو له وچېدو وروسته نورو سیمو ته کډه شوي دي. په کوم کلي کې چې موږ کار کړی، شاوخوا نیمايي کورونو د پاکو اوبو د کموالي له کبله خپلې مېنې پريښې دي.»
د ماشومانو د خوندیتوب سازمان زیاته کړې چې افغانستان د اقلیمي بدلونونو پر وړاندې شپږم زیانمن هېواد دی او د دغو بدلونونو پر وړاندې د مبارزې لپاره تر ټولو کمه وړتیا لري.
د افغانستان د چاپېریال ساتنې ملي ادارې تر دې مخکې ویلي و چې هېواد کې د اقلیمي بدلونونو پر وړاندې د مبارزې لپاره د نړیوالې ټولنې مرستو او په دې برخه کې د نیمګړیو پروژو بیا پیلولو ته اړتیا لري.