فلسطیني چارواکي وايي چې د غزې تړانګه کې د اسراییلي ځواکونو لهخوا د څلور یرغمل شویو کسانو د خوشې کولو لپاره د عملیاتو پرمهال ۲۱۰ فلسطیني وګړي وژل شوي دي.
دغه څلور کسان د هغو یرغمل شویو له ډلې دي چې د اکتوبر پر اوومه پر اسراییلو د حماس ډلې د برید پرمهال یرغمل نیول شوي وو.
د سلاموطندار پښتو فېسبوکپاڼه وڅارئ
د دوی په وینا، اسراییلي ځواکونو د غزې په النصیرات کمپ کې د یادو کسانو د خوشې کولو عملیات کړي چې تر ټولو خونړي بلل شوې دي.
الجزیزې خبري شبکې په یوه راپور کې ویلي چې د اسرائیلو پوځ د غزې په تړانګه کې د هوا، ځمکې او سمندر له لارې سخت بریدونه کړي چې له امله یې تر ۲۱۰ ډېر کسان وژل شوي او له جګړې ستړي بېځایه شویو خلکو کې وېره خپره کړې.
د شنبې پر ورځ «جون تمه» د غزې په کلابندو سیمو په تېره بیا د غزې په مرکزي ښار دیرالبلح او نصیرات، سوېل کې د رفح ښار په لوېدیځ کې پر کورونو او شمال ته د غزې د ښار په ګڼو سیمو باندې لسګونه هوايي بریدونه شوي دي.
غزه کې د روغتیا وزارت ویلي چې د الاقصی شهیدانو روغتون ته لوی شمېر وژل شوي او ټپیان ورلېږدول شوي چې ډېری یې ښځې او ماشومان دي.
دغه وزارت ویلي: «په لسګونو ټپيان پر ځمکه پراته دي او طبي ډلې هڅه کوي چې د لومړنيو طبي امکاناتو په مرسته يې وژغوري. د درملو او خوراکي توکو کمښت سره مخ یوو او د تېلو نشتون له امله جنراټور له کار لوېدلی دی.»
بلخوا رویټرز خبري اژانس نن یکشنبه، جون نهمه، د اسراییلو د پوځ د یوه ویاند له قوله ویلي چې دغه عملیات د النصیرات په یوې هستوګنیزه سیمه کې شوي، چېرته چې حماس یرغمل شوي، کسان ساتل.
د رویټرز په راپور کې راغلي چې د حماس ډلې د عملیاتو پرمهال پر اسراییلي ځواکونو بریدونه کړي چې اسراییلو یې د هوايي ځواکونو په ملاتړ ځواب ورکړی دی.
د راپور پر بنسټ، اسراییلو پوځ دا منلې چې یادو عملیاتو کې له لږ تر لږه ۱۰۰ فلسطینیان وژل شوي، خو په وینا یې، نهپوهېږي چې څومره به یې د حماس ډلې غړې وي.
د غزې اوسېدونکو او مرستندویه بنسټونو بیا ویلي چې دې عملیاتو کې ګڼشمېر کسان وژل شوي چې ښځې، ماشومان او نارینه پهکې شامل دي.