د خوست محلي مسوولان وايي چې دغه ولایت کې د څه باندې ۱۶ میلیونه افغانیو په ارزښت د اوبو یو کانال او سربند جوړ او ګټېاخیستنې ته سپارل شوې دي.
د خوست د «شملخرم» سينديزې فرعي حوزې رييس عبدالقيوم ثابت سلاموطندار ته وايي چې د ياد ولايت د صبریو ولسوالي د سوري پاڼ کانال او سربند چارې بشپړې او تېره ورځ ګټېاخيستنې ته وسپارل شول.
د سلاموطندار پښتو فېسبوکپاڼه وڅارئ
د ثابت په وینا، ياد سربند او کانال ۱۴۰۰ متره اوږدوالی لري چې ۱۶ میلیونه او سل زره افغانی لګښت پرې راغلی دی.
نوموړي زیاته کړه چې د یادې پروژې مالي لګښت د سويس د مرستو پرمختيايي ادارې له لوري ورکړل شوی او تخنيکي او د رغونې چارې يې د اړیکو دفتر (TLO) په مرسته مخته وړل شوي دي.
ياده پروژه د اتو میاشتو په موده کې پلې شوې چې پهکې سلګونو کسانو ته د کار زمینه هم پهکې برابره شوې وه او ۶۸۸ هکتاره کرنیزه ځمکه به خړوبه کړي.