بلخ کې چارواکي وايي چې له دغه ولایت څخه د لومړي ځل لپاره د فومېکېشن له لګښت پرته اوزبیکستان ته ۲۵۰ ټُنه کچالو صادر شوي دي.
د بلخ ولایت مقام د رسنیو دفتر څخه په خپره شوې خبرپاڼه کې راغلي چې ۲۵۰ ټُنه کچالو په لسو باروړونکو موټرو کې پرون سهشنبه، وږي ۲۷مه د حیرتان بندر له لارې اوزبیکستان ته لېږدول شوې دي.
د خبرپاڼې له مخې، افغان سوداګرو څخه د ملاتړ او اسانتیاوې رامنځته کېدو په موخه سرپرست حکومت پر هغو سوداګریزو توکي د فومېکېشن لګښت معاف کړی چې ګډ بازار ته لېږدول کېږي.
له دې وړاندې به سوداګرو د سوداګریزو توکو فوموګېشن لپاره له ۱۲ تر ۱۵زره افغانۍ ورکولې.
د بلخ د سوداګرۍ او پانګونې خونې مسوول اسدالله اسدي د مسوولانو له همکارۍ د مننې ترڅنګ، وايي، د صادراتو د لېږد زیاتوالی کولاي شي، د اقتصادي پیاوړتیا لامل شي او ځانبسیاینې کې اغېزمنه ثابته شي.
دا مهال له افغانستان څخه اوزبیکستان ته له تازه او وچې مېوې سربېره، زعفران، دیکبُخار او نور توکي هم صادرېږي.