د کاپیسا د شخړو د حل امر له خپلو وسلهوالو کسانو سره په دغه ولایت کې یو خبریال او د هغه تصویراخیستونکی وهلی ډبولی دی.
د دانش راډیو ټلوېزیون خبریال مقبول نوري او د هغه تصویراخیستونکی نن غرمه د کاپیسا ولایت د شخړو د حل امر عبدالوارث قاضي او د هغه د وسلهوالو له لوري وهل شوی دی. عبدالوارث قاضي یاد کسان دوه ساعته بندیان کړي هم دي.
مقبول نوري سلاموطندار ته ویلي چې د سلګونه جریبه غصب شوې ځمکې په اړه د راپور جوړولو په موخه کاپیسا ته تللی و، خو د دغه ولایت د شخړو د حل امر او د هغه ساتونکو ځکه وهلی ډبولی چې د غصب شویو ځمکو تصویرونه یې اخیستل.
هغه ټینګار کوي چې یاد حکومتي چارواکي ترې وسایل اخیستي او دوه ساعته یې بندیان کړي هم وو.
د کاپیسا والي عبداللطیف مراد هم دا پېښه تاییدوي او ژمنه کوي چې د دغه ولایت ولایتي اداره به یې وڅېړي.
خبریالان تل په کاپیسا او شاوخوا نورو ولایتونو کې د پېښو د انعکاس او د اطلاعاتو راټولولو پر مهال له بېلابېلو ستونزو سره مخامخ شوي چې دا ستونزې بیا ان د چارواکو او مسوولانو پر شخصي عقدو بدلې شوې دي.
