اوکراین، بوگون (۲۸-جوزا/۱۸-جون، پنجشنبه)، بیر هفتهده ایکینچی مرته مسکونینگ نفتنی قیته ایشلش کارخانهسینی پهپادی هجوملر بیلن نشانگه آلدی.
مسکو بلدیهسی سرگئی سوبیانیننینگ اعلام قیلیشیچه، روسیهنینگ هوا مدافعه تیزیملری اوکرایننینگ ۶۰ دن آرتیق پهپادینی یوق قیلگن، لیکن ینه هم پهپادلردن قطاری مسکو جنوبشرقیده جایلشگن «کاپوتنیا» منطقهسیدهگی نفتنی قیته ایشلش کارخانهسیگه ییتیشه آلگن.
محلی رسمیلرگه کوره، مذکور هجوم جریانیده مسکو اطرافیدهگی نیچه قوتلی بیر بنا، بیرته صناعتی مرکز و نیچهته شخصی یشش اوی هم زیان کورگن.
روسیهنینگ گوجوملی خلقارا هوا قونالغهلریدن بولگن «شرمتیوو»، اوشبو هجومدن کیین وقتینچهلیک شکلده فعالیتینی توختهتیب و یولاوچیلرینینگ بیر قسمینی بوشهتگن. رسمیلرنینگ اعلام قیلیشیچه، اوچیش توغریسیدهگی چیکلاولر نیچه ساعتدن کیین بیکار قیلینیب و قونالغه فعالیتی قیته باشلنگن.
بو، سونگی نیچه کون ایچیده مسکو نفتنی قیته ایشلش کارخانهسیگه اویوشتیریلگن ایکینچی هجوم دیر. آگاه منبعلرنینگ رویترز آژانسیگه ایتیشیچه، اوکرایننینگ سهشنبه کونی اویوشتیرگن پهپادی هجومی اوشبو قوریلمه فعالیتینینگ توختهیشیگه سبب بولگن.
روسیه، دنیا دهگی اوچینچی ییریک نفت ایشلب چیقرووچی و نفت بیلن نفت محصوللرینینگ اینگ ییریک صادر قیلووچیلریدن بیری حسابلنهدی و حاضر ایسه پترول کملیگی خوفی بیلن روپهره دیر.
