امریکا شرمندهلی مغلوبیت گه اوچرهدی. بونی ایران رسمیلری ایتماقده. امریکا جمهور باشلیغی دونالد ترامپ ایسه ماجرادهگی مهم استراتیژیک نقطه حسابلنگن هرمز بوغوزینی آچیش شرطی بیلن ایراننی بمباردمان قیلیشنی ایکی هفته گه توختهتیشگه راضی بولگنینی بیلدیردی و اوروش یکونی امریکا فایدهسیگه ایشلهیاتگنینی ادعا قیلدی. سیاستچیلر بولسه ایران بو بیتیمگه پاکستاننینگ دیپلماتیک سعی-حرکتلری و چیننینگ تهران گه قیلگن باسیمی آرتیدن راضی بولگنینی بیلدیرماقده. اسرائیل ایسه ترامپنینگ صلحی گه «توپوریب» لبنان گه ضربه بیریشنی دوام ایتماقده. خوش، اوروش تیز آرهده یکونلنهدیمی یا کی ایران و امریکا کیلیشوویده ایتیلگن ایکی هفتهلیک مدت توگهگندن سونگ ینه دوام ایتهدیمی؟
اوروشنی توختهتگن ۱۰ بندلیک صلح نیمهدن عبارت؟
جاری ییلنینگ ۷ اپریل کونی امریکا جمهور باشلیغی دونالد ترامپ اوزینینگ تروث سوشیال اجتماعی ترماغیده امریکا قوشمه ایالتلری پاکستان واسطهچیلیگیده ایران تامانیدن تکلیف قیلینگن ۱۰ بندلیک صلح گه راضیلیگینی و شو بیلن ایراننی بمباردمان قیلیشنی ایکی هفته گه توختهتیشینی معلوم قیلدی. اولراق ترامپ ایران گه اولتیماتوم قوییب، ایراننینگ اینفرهتوزیلمهسی (آست قوریلمه)، خصوصاً کوپرلیکلر و برق منبعلری بوزیلیشی، مملکت «تاش دوری» گه قیتریلیشی حقیده قطعی آگاهلنتیریش بیرگن ایدی. بیراق بو تهدیدلر پاکستان واسطهچیلیگیده آلیب باریلگن دیپلماتیک علاقهلر نتیجهسیده حربی عملیاتلرنی وقتینچهلیک توختهتیب توریشگه ایلنیب کیتدی.
«پاکستان باش وزیری شهباز شریف و عاصم منیر بیلن اوتکزیلگن صحبتلر اساسیده، اولر اوتگن کیچه ایران گه یوباریلهیاتگن هلاکتلی کوچنی وقتینچه توختهتیب توریشیمنی سورهدی. شونینگدیک، ایران هرمز بوغوزینی تولیق، درحال و خوفسیز آچیشگه راضی بولیشی شرطی بیلن مین ایران گه قرشی بمباردماننی و هجوملرنی ایکی هفته مدت گه توختهتیشگه راضی من. بیز ایراندن ۱۰ بنددن عبارت تکلیف آلدیک و اونی مذاکرهلر آلیب باریش اوچون مقبول اساس دیب حسابلهیمیز. اوتگن بحثلی مسئلهلرنینگ دییرلی برچهسی امریکا و ایران اورتهسیده کیلیشیب آلینگن. اما ایکی هفتهلیک مدت یکونی کیلیشوونی تولیق رسمیلشتیریش و عملگه آشیریش امکانینی بیرهدی.» دیگن آق اوی رهبری.
ترامپ بو مذاکرهلرنی «ایکی تامانلمه اوت آچیشنی توختهتیش بولهدی» دیب بهالهگن اونینگ فکریچه، امریکا اوز آلدیگه قوییلگن برچه حربی وظیفهلرنی موفقیتلی ادا ایتیب بولگن و حاضرده تامانلر یکونی تینچلیک شرطنامهسی اوستیده قیزغین ایش آلیب بارماقده. امریکا رهبری تهراندن آلینگن ۱۰ بنددن عبارت تکلیفلر توپلمی کیلهجکدهگی کیلیشوو اوچون مستحکم پایدیوار بولیشینی بیلدیرگن. اولر آرهسیده امریکانینگ ایران گه هجوم قیلمسلیک تمایلی، تهراننینگ هرمز بوغوزی اوستیدن نظارتی، ایران حدودیده یورانیومنی باییتیش، اساسی و ایکیلمچی تحریملرنی بیکار قیلیش، تاوان پولی تولش، امریکا کوچلرینی منطقهدن آلیب چیقیب کیتیش کبی شرطلر بار.
بوندن تشقری، پاکستان باش وزیری ایران و امریکا راضی بولگن اوت آچیشنی توختهتیش «لبنانده و همه جای»ده عمل قیلیشی کیرهکلیگینی ایتگن. امریکاده هم ایران و لبنان گه یوللنهیاتگن ضربهلر توختهگنی حقیده خبرلر ترقهلگن.
ایکینچی تامانده ایسه، ایران رسمیلری بو بیتیمنی «امریکانینگ شرمندهلی مغلوبیتی» دیب تلقین قیلگن. ایران ملی خوفسیزلیک عالی کینگشینینگ بیلدیریشیچه، دشمن ایران خلقی گه قرشی آلیب بارگن عدالتسیز، ناقانونی و جنایی اوروشده انکار ایتیب بولمهیدیگن، تاریخی و ققشهتیش مغلوبیت گه اوچرهگن.
«ایران بویوک غلبه گه ایریشدی و جنایتچی امریکانی اون بنددن عبارت ریجهنی قبول قیلیشگه مجبور ایتدی. اوشبو ریجه گه کوره، امریکا ایران گه هجوم قیلمسلیک، هرمز بوغوزی اوستیدن ایران نظارتینی سقلب قالیش، یورانیومنی باییتیش حقوقینی تن آلیش، برچه بیرلمچی و ایکیلمچی تحریملرنی بیکار قیلیش، بیرلشگن ملتلر تشکیلاتی خوفسیزلیک کینگشینینگ برچه قطعنامهلرینی توختهتیش، تاوان پولی تولش، امریکا حربی کوچلرینی منطقهدن آلیب چیقیب کیتیش همده برچه جبههلردهگی اوروشنی، جملهدن لبناننینگ قهرمان اسلامی قرشیلیک حرکتی گه قرشی کورهشنی توختهتیش مجبوریتینی آلدی»، دیب یازیلگن ایران ملی خوفسیزلیک کینگشینینگ «فارس» آرقهلی ترقهلگن بیاناتیده.
قیزیق تامانی شونده کی، بو کیلیشوو فقط ایران رسمیلری تامانیدن «غلبه» صفتیده بهالنمهگن. روسیه خوفسیزلیک کینگشی باشلیغی اورین باسری دیمیتری مدودف هم امریکا جمهور باشلیغی دونالد ترامپنینگ ۱۰ بنددن عبارت ریجهنی محاکمه قیلیشگه راضیلیک بیرگنینینگ اوزی ایران اوچون موفقیت ایکنینی تأکیدلهگن. بو حقده او اوزینینگ تلگرام کانالیده یازیب قالدیردی.
«ترامپنینگ ۱۰ بندلیک ریجهنی محاکمه قیلیشگه راضی بولگنینینگ اوزی ایرانلیکلرنینگ یوتوغی. معما شونده کی، واشنگتن بونگه کونهدیمی؛ اخیر او ییرده ایران گه ییتکزیلگن ضررنی قاپلش، هسته دستورنی دوام ایتتیریش و تهراننینگ هرمز بوغوزی اوستیدن نظارتی مسئلهلری بار» دیب یازدی سیاستچی.
ایران تشقی ایشلر وزیری عباس عراقچی ایسه، ایکس اجتماعی ترماغیده ایکی هفته مابینیده سودا کیمهلری اوز حرکتلرینی ایرانلیک حربیلر بیلن موافقلشتیرگن حالده، هرمز بوغوزیدن اوتیشی ممکنلیگینی تصدیقلهگن.
«باش وزیر شهباز شریفنینگ مراجعتی، شونینگدیک، امریکانینگ ۱۵ بنددن عبارت تکلیفی و امریکا جمهور باشلیغینینگ ایراننینگ ۱۰ بنددن عبارت تکلیفینی مذاکرهلر اوچون اساس صفتیده کوریب چیقیشگه تیارلیگی حقیدهگی بیاناتینی انابت گه آلگن حالده، ایران ملی خوفسیزلیک عالی کینگشی نامیدن قوییدهگینی معلوم قیلهمن: اگر ایران گه قرشی هجوملر توختهتیلسه، قوراللی کوچلریمیز مدافعه حرکتلرینی توختهدی»، دیگن عباس عراقیچی.
شونینگدیک، عراقچی ایکی هفته دوامیده هرموز بوغوزی آرقهلی کیمهلرنینگ خوفسیز اوتیشی تأمینلنیشینی، بیراق بو جریان ایران حربیلری بیلن موافقلشتیریلیشینی همده معلوم تخنیک چیکلاولر انابت گه آلینیشینی علیحده اورغولهدی.
ایران چیننینگ باسیمی سبب صلح گه راضی بولدیمی؟
خلقارا نشرلرنینگ معلوماتلریگه کوره، ایران امریکا بیلن ایکی هفتهلیک اوت آچیشنی توختهتیش کیلیشووی گه پاکستاننینگ دیپلماتیک سعی-حرکتلری و چیننینگ تهران گه قیلگن باسیمی آرتیدن راضی بولگن.
قید ایتیلیشیچه، پاکستان فعال روشده صلحنی ایلگری سورگن، چین ایسه سونگی دقیقهلرده تهراننی ماسلشوچن بولیشگه و کیسکینلیکنی کمهیتیریشگه چقیرگن. بوندن تشقری، مهم ییتکزیلگن اقتصادی ضرر هم ایراننینگ اوشبو قرارنی قبول قیلیشگه تأثیر کورستگن. «نیویارک تایمیز» نشرینینگ یازیشیچه، ایراننینگ ینگی عالی رهبری آیتالله مجتبی خامنهای چیننینگ آخرگی دقیقهدهگی باسیمی و کیسکین دیپلماتیک مذاکرهلریدن سونگ پاکستان تشبث کورستگن ۲ هفتهلیک صلح ریجهسینی معقوللـهگن. بیراق حاضرچه اوشبو مذاکرهلر گه ارهلشگنینی رسماً تصدیقلمهگن.
پاکستان باش وزیری شهباز شریف اوزینینگ ایکس اجتماعی ترماغیدهگی پوستیده امریکا جمهور باشلیغی ترامپ گه مراجعت قیلیب، دیپلماتیک اوچون امکانیت بیریشنی سورهگن.
«مین جمهور باشلیغ ترامپدن [اولتیماتوم] مدتینی ایکی هفته گه اوزهیتیریشنی قطعی سورهی من. پاکستان ایرانلیک برادرلریدن ایزگو نیت رمزی صفتیده هرمز بوغوزینی تیگیشلی ایکی هفتهلیک مدت گه آچیشنی چین دلدن التماس قیلهدی… تا کی دیپلماتیک منطقهدهگی اوزاق مدتلی تینچلیک و برقرارلیک یولیده اوروشنی اوزیل-کیسیل توختهتیشگه ایریشسین»، دیگن شهباز شریف.
شو بیلن بیرگه، شریف ایران و امریکا هیئتلرینی «برچه نزاعلرنی حل قیلیش بوییچه یکونی کیلیشوو گه ایریشیش» اوچون ۱۰ اپریل کونی اسلامآباد گه مذاکرهلر میزیگه تکلیف قیلگن. سیانان تیلیکانالی خبریگه کوره، امریکا هیئتی ترکیبیدن جیدیونس، جمهور باشلیغنینگ مخصوص ایلچیسی ویتکاف و ترامپنینگ کیاوی جارد کوشنر اورین آلهدی.»
اسرائیل ترامپنینگ صلحی گه «توپوردی»
امریکا جمهور باشلیغی دونالد ترامپ تامانیدن اعلان قیلینگن صلح بیتیمیدن بیر کون هم اوتمهی، اسرائیل درانی ۸ اپریل کونی لبناننینگ جنوبیده جایلشگن ال-کلیله یشش منطقه یقینیده تیز یاردم موتریگه ضربه بیردی. بو ضربه آرتیدن شفاکارلر و موتر ایچیده بولگن کسل هلاک بولگن. واقعه جاییده تیزلیک بیلن قوتقرو ایشلری آلیب باریلگن. موتر قیسی شفاخانه گه تیگیشلی ایکنی حلی انیقلنمهگن. اسرائیل تامانی بو ضربهنی «حزبالله» گه قرهتیلگنینی بیلدیرگن، اما واقعه عاقبتیده گروه گه تیگیشلی هیچ کیم جبرلنمهگن. بو حرکت امریکا و ایران کیلیشگن ۲ هفتهلیک بیتیمنینگ عملده بوزیلیشی دیر. چونکی صلح امریکا و ایران اورتهسیده توزیلگن بولیشیگه قرهمی، اونی اسرائیل هم قبول قیلگن. ایران تامانیدن تقدیم ایتیلگن بیتیمده لبنان گه ضربه بیرمسلیک شرطی هم قوییلگندی. بونی پاکستان باش وزیری شهباز شریف هم ایتگن. لبنان ساغلیقنی سقلش وزیرلیگینینگ بیلدیریشیچه، ۳ اپریل حالتیگه کوره، اسرائیل هجوملری عاقبتیده مملکت بویلب قربانلر سانی مینگدن آشگن، ینه تورت مینگدن آرتیق کیشی جراحت آلگن.
یازووچی: ملکهبانو محمدوه
عرب الفبا گه اوگیروچی: نصرتالله احدی
