بلخ ولایتیده توز ایشلب چیقروچی و پروسس قیلوچیلردن بیرقطاری، بو ولایت ستندرد و ساغلام توزیش ایشلب چیقریش بولیمیده اوزینی-اوزی تأمینلش گه ییتگنینی ایتهدیلر. اولر گه کوره، حکومت تامانیدن قوللب-قوتلنگن حالده، توز بولیمیده ایچکی احتیاجلرنی تأمینلش گه قوشیمچه، تشقی مملکتلر گه هم صادر قیلیشلری ممکن.
بلخده توز ایشلب چیقروچی فابریکهلردن بیرینینگ وکیلی غلامرسول ملکزی شوندهی دییدی: «بلخده توز ایشلب چیقرهیاتگن فابریکهلر بوتون مملکت توزینی تأمینلشگه قوربی ییتهدی. تولیدلریمیز صفتلی، ستندرد و ساغلام بولیشیگه سعی-حرکت قیلهمیز.»
شو بیلن بیرگه، توز ایشلب چیقروچی فابریکهلردن باشقه بیرینینگ وکیلی اسماعیل روفیان، اسلام امیرلیگیدن توز کانلری ایچکی شرکتلر تامانیدن قزیب چیقریلیشینی سورهیدی. او شوندهی دییدی: «دولتدن ایستهیمیز توز کانلرینی ستندرد قیزیب آلیشگه قوربی ییتهدیگن ایچکی شرکتلر گه بیرسین، بوندهی بولسه هم صناعت رواجلنهدی و هم فابریکهلر قوللب-قوتلنهدی.»
بلخده بو فابریکهلر فعالیتی، ایریم یاشلر گه ایش زمینهسینی یرهتگن. اوشبو بولیمده ایشلهیاتگنلر فعالیتلری کوپهیگنیدن خورسندلیک قیلیب و کوپراق ایش فرصتلری یرهتیلیشیگه امید بیلدیرهدیلر.
اوشبو فابریکهلردن بیرینینگ ایشلاوچیسی محمدعارفنینگ ایتیشیچه: «مملکت سوداگرلریدن ایستهیمیز – صلح و تینچلیک برقرار ایکن، کیلیب یشاوچیلر گه ایش فرصتلرینی یرهتسینلر و یاشلرنینگ کیلهجگی آیدین بولسین.»
فابریکهلردن باشقه بیرینینگ ایشلاوچیسی مظفر، دولتدن ایچکی تولیدلر کوپهلیشی و کوپراق ایش فرصتلری یرهتیلیشی اوچون فابریکهلرنی قوللب-قوتلشینی سورهیدی. اونینگ ایتیشیچه: «دولتدن ایستهیمیز، افغانستاندهگی فابریکهلرنی قوللب-قوتلهسین – یاشلر گه ایش فرصتلری یرهتیلسین. یاشلردن هم مملکت ترقیاتی اوچون کیلیب بو فابریکهلرده ایشلشلرینی سورهی من.»
شو بیلن بیرگه، بلخ صناعت و کانلر اتاقی مسئوللرینینگ ایتیشلریچه، شمال زونیده معیاری شکلده توز ایشلب چیقرهدیگن آلتی بویوک فابریکه فعال دیر. اوشبو اتاق مسئولی امامالدین سناییزاده، مملکتده هر ییلی سیزیلرلی مقدارده توز ایشلب چیقریلهدی، اونینگ بیر قسمی آزیق-آوقت تیارلش و باشقه بیر قسمی ایسه چارواچیلیک ساحهسیده صرفلنیشینی ایتهدی. او شونده دییدی: «هر ییلی ۲۰۰ مینگ تُن توز ایشلب چیقرهمیز و ۱۵۰ مینگ تُن توز حیوانلر اوچون ایشلب چیقریلهدی.»
بلخ صناعت و سودا ریاستی اورین باسری نصیراحمد نیازی گه کوره، اسلام امیرلیگی ایچکی و تشقریدهگی سرمایه کیریتووچیلرنی قوللب-قوتلب و اولر گه سرمایه کیریتیش فرصتلرینی یرهتیشگه سعی-حرکت قیلماقده. اونینگ ایتیشیچه: «صناعت و سودا ریاستی، ایچکی تولیدلر و سرمایه کیریتوچیلرنی قوللب-قوتلهیدی. سرمایه کیریتوچیلرنی ترغیب قیلیش بیلن مملکت ایچیده کوپراق ایش فرصتلری یرهتیلیشیگه حرکت قیلماقدهمیز.»
کانلر و پترولیم وزیرلیگی معلوماتیگه کوره، تورلی ولایتلر جملهدن تخار، سمنگان، بلخ، فاریاب، غور، هرات، غزنی، پکتیا، قندهار و پروان ولایتلریده ییریک توز کانلری بارلیگی انیقلنگن و اولرنینگ ایریملریدن توز قزیب آلیش ایشلری دوام ایتماقده.
