ترکمنستان تشقی ایشلر وزیری رشید مرادوف، بوگون “شنبه” ایرته‌دن چاغیده کابل‌گه کیلیب اسلامی امارت رئیس‌الوزراسی ملا محمدحسن آخوند و تشقی ایشلر وزیرلیگی سرپرستی امیرخان متقی بیلن اوچره‌شگن. اسلامی امارت سوزلاوچیسی ذبیح‌الله مجاهد نینگ ایتیشیچه، اوشبو اوچره‌شووده اقتصادی، سوداگرلیک، خوفسیزلیک و انسان دوستلیک یاردم‌لر خصوصیده بحث ایتیلگن.
جناب مجاهد نینگ کوپه‌یتیریشیچه، اوشبو اوچره‌شووده تاپی پروژه‌سی نینگ تیزلیککه باشله‌نیشی خصوصیده تعهد قیلینگن. اسلامی امارت سوزلاوچیسی گه کوره، جوزجان-ترکمنستان و ترکمنستان-هرات ده تیمور یولی نینگ قوریلیش ایشی تیزلیککه باشله‌نیشی و هرات گه ۵۰۰ ولت برق انتقال بیریلیشی خصوصیده کیلیشوو صورت تاپگن.
جناب مجاهد نینگ ایتیشیچه، ترکمنستان تشقی ایشلر وزیری انسان دوستلیک یاردم‌لرنی کینگی‌تیریش و افغانستان ایچکی ایشلریگه دخالت قیلمه‌یشیدن ایشانچ بیرگن.
رشید مرادوف افغانستان تشقی ایشلر وزیرلیگی سرپرستی امیرخان متقی بیلن هم اوچره‌شگن. تشقی ایشلر وزیرلیگی نینگ اعلان قیلیشیچه، اوشبو اوچره‌شووده تاپی پروژه‌سی و باشقه کینگی‌تیریش پروژه‌لر تیزلیککه باشله‌نیشی خصوصیده تاکید ایتیلگن.
افغانستان تشقی ایشلر وزیرلیگی سوزلاوچیسی عبدالقهار بلخی نینگ ایتیشیچه، اوشبو اوچره‌شووده جناب مرادوف اوز مملکتی ایکی تامانلمه رابطه‌لر کوچلی بولیشی و یاردم‌لر دوام تاپیشیدن ایشانچ بیرگن. تشقی ایشلر وزیرلیگی سوزلاوچیسی گه کوره، ترکمنستان چیگره‌لریده خوفسیزلیک تامین ایتیلگنی و سوداگرلیک جریانیدن رضایت کورستگن.
مذکور اوچره‌شووده افغانستان تشقی ایشلر وزیرلیگی سرپرستی امیرخان متقی پروژه‌لر عملگه آشیریلیشی خصوصیده تیارگرلیک کورستگن و ترکمنستان دولتیدن سوداگرلیک رابطه‌لر رواجلنیشی اوچون افغانستان‌لیک سوداگرلریگه ویزه و باشقه تسهیلات فراهم قیلیشی‌نی سوره‌گن.
