افغانستان تینچلیگی توغریسیده استانبول ییغینی منطقه و دنیا نماینده‌لری نینگ حضوری بیلن ۲۴- اپریل آیی ده یولگه قوییلیشی گه قرار قیلنیگن ایدی، بیراق ایتیلیشیچه بو ییغین یولگه قوییلیشی رمضان بیره‌می دن کیین گه قالگن.
بیرلشگن ملتلر تشکیلاتی و ترکیه و قطر مملکت‌لری قوشمه بیر اعلامیه نشر قیلیب ایتیش‌لریچه، استانبول ییغینی برچه تامانلرنینگ مصلحتی و توغری بیر شرایط فراهم ایتیلیشی گه قدر کیچیکتیریلگن.
خلق‌ارا علاقه‌لر ایش بیلرمان‌لردن قطاری نینگ ایتیش‌لریچه، طالبان استانبول ییغینی گه شرکت قیلمه‌یش بیلن جمهوررئیس غنی نینگ اوزاق‌لشتیریش و اونینگ استعفا گه زورلنتیریشی اوچون حرکت قیلماقده.
خلق‌ارا علاقه‌لر ایش بیلرمان‌لردن بیری طارق فرهادی نینگ ایتیشیچه: «طالبان، چیت‌ایللیک کوچلر مملکتدن چیقیب و حکومت کوچسیز بولگنیدن کیین مذاکره گه حاضر بوله‌دیلر. او وقت گچه رهبرلریدن قطاری بیلن علاقه‌لرینی کوچلنتیره‌دیلر و او زمان جمهوررئیس استعفا بیرگنیدن کیین ییغین‌لرگه شرکت قیله‌میز دیدیلر.»
خلق‌ارا علاقه‌لر ایش بیلرمان‌لردن باشقه بیری باقر محسنی نینگ ایتیشیچه: «جناب غنی استعفا بیرگونگه قدر طالبان لرنینگ یاشیرین مذاکره‌لری و حرکت‌لری دوام تاپه‌دی و جناب غنی نینگ استعفاسی طالبان گه مانور میدانی یره‌ته‌دی.»
شونینگدیک نماینده‌لر کینگش باشلیغی میررحمان رحمانی نینگ ایتیشیچه، افغانستان اهالیسی استانبول ییغینی گه امیدوار ایکن، بیراق بو ییغین اَیریم دلیل‌لر باعث کیچیکتیریلدی.
او طالبان نی خطاب قرار بیریب ایتیشیچه، استانبول ییغینی بیر فرصت دیر و بو قولدن کیتمه‌سی لازم. «افغانستان اهالیسی ترکیه ییغینی گه امیداوار ایدی و اولر بو ییغین تیزلیککه یولگه قوییلیشی و نتیجه گه ایریشی نی کوتیب تورگن ایدیلر، بیراق قیغو بیلن بو ییغین کیچیکتیریلدی. افغانستان اوروشی نینگ هیچ قندی دینی و شرعی مشروعیتی یوق و بو اوروش تیزلیککه توخته‌تیلیشی کیره‌ک. اوروش یکونله‌نیشی اوچون تینچلیک سوزلشوولری باشله‌نیب و سیاسی بیر کیلیشوو تینچ بیر حیات گه زمینه یره‌تیشی کیره‌ک.»
بوندن آلدین رویترز خبرگزارلیگی تینچلیک مذاکره‌لریدن باخبر منبع‌لردن نقل قیلیب گزارش بیریشیچه، مذاکره کیچیکتیریلیشی دلیلی طالبان نینگ شرکت قیلمه‌سلیگی دیر. استانبول ییغینیده طالبان نماینده‌لری نینگ شرکتی و شرکت قیلمه‌سلیگی توغریسیده بو گروه نینگ فکرینی اورگه‌نیش ایسته‌دیک، بیراق موفق بولمه‌دیک.
استانبول ییغینی افغانستان کیله‌جگی و تینچلیگی اوچون اونملی ییغین‌لردن بیری دییلگن و بو ییغین ده طالبان و افغانستان حکومتی اوروش یکونله‌نیشی و تینچلیک انتقالی دولت تشکیل ایتیلیشی اوستیگه کیلیشیش‌لری گه قرار قیلینگن.
