ایرتهلب ساعت ۰۵:۰۰ و حاضرگچه سمنگاننینگ زراعتی ییرلریگه قویاش نوری ییتیشمهگن بیر پیتده، بو ولایت حضرت سلطان تومنی یشاوچیسی بولمیش ۳۵ یاشر وحیده اوی باغچهسی ایشلری بیلن شغللنگن.
او، بیش ییلدن بویان اقتصادی قیینچیلیکلر سبب اوی مسئولیتلری یانیده سبزهوات ایکیش ایشلری بیلن شغللهنیب و بو یول آرقهلی عایلهسی نیازلرینینگ بیر قسمینی تامینلشگه سعیوحرکت قیلماقده. «نیچه ییل آلدین اقتصادی قیینچیلیک سبب، سبزوهات ایکیش ایشیگه باشلهدیم و کوپراق سبزهوات ایکیش و اوی باغچهسی ایشلری بیلن شغللنگنمین. پمیدار، کدو، گشنیز، نعنا و باشقه تور سبزهواتلرنی ایکهمن.»
وحیدهنینگ ایتیشیچه، اوی باغچهسی آرقهلی عایلهسینینگ دستلبکی نیازلری همده حیات خرهجتلرینینگ بیر قسمینی تامینلش اوچون سعیوحرکت قیلگنی بیرحالده، سوو تنقیصلیگی، زراعتی کودلر قیمتلیگی و مناسب بازار یوقلیگی، اونی کوپینچه قیینچیلیکلر بیلن روپهره قیلگن. «سبزهوات ساتیش آرقهلی قولگه کیلتیرهدیگنیم درآمد عایله صرف-خرهجتلرینینگ تامینلشگه بیراز یاردم بیرهدی. شونینگدیک موسسهلر هم بیزلرگه زراعتی تعلیملر، اوروغ و کیمیاوی کود امکانیتینی یرهتگن. اینگ کته قیینچیلیگیمیز سوو تنقیصلیگی، محصوللر ساتیلیشی اوچون مناسب بازار یوقلیگی و زراعتی اوروغلر بیلن کود قیمتی دیر.»
شونینگدیک اونینگ اورغولشیچه، مناسب بازار یرهتیلیشی و عیاللرنینگ کوپراق قوللب-قوتلنگنی صورتده، فعالیتلرینی رواجلنتیریب و تولیدلرینینگ کوچهیتیرماقچین. «عیاللر ایشلری اوچون مناسب بازار بولگنی کوپینچه یاردم اختیاریمیز گه قرار تاپگنی صورتد، عیاللر فعالیتلرینینگ کوچهیتیره آلهدیلر. مین هم تولیدلریم سطحینینگ کوپهیتیریب و کیلهجکده بازار گه کوپینچه محصول چیقریشنی ایستهیمن.»
سمنگان ولایتیدهگی عیاللر، اوی باغچهنی یرهتیش و سبزوهوات ایکیشگه علاوه شونینگدیک تاووقچیلیک کبی باشقه فعالیتلر یولی آرقهلی محلی جمعیت و عایله اقتصادی یخشیلنیشی بوییچه فعال و یخشی رول اوینهیدیلر.
تاووقچیلیک آرقهلی عایله خرهجتینی تامین قیلهدیگن سمنگان ولایتی درهی زندان تومنی یشاوچیسی بولمیش ۳۸ یاشر شگوفه امیرینینگ ایتیشیچه: «فعالیتیمنی اویده نیچه جوجهنی سقلش بیلن باشلهدیم. تاووقچیلیککه قیزیققنیم اوچون بو ایشگه دوام بیردیم. حاضر یومورتقه ساتیش آرقهلی عایلهمنینگ نیازلرینی تامین قیلهمن.»
شوندهی بیرحالده، اقتصادی مسئلهلر بیلرمانلری عایلهلر اقتصادی وضعیتی یخشیلنیشی و زراعتی تولیدلر رواجلنیشیده عیاللر اورنینی مهم بیلهدیلر. اولرنینگ ایشانچیگه کوره، زراعتی تعلیملر امکانیتی یرهتیلیشی، کیچیک قرضهلر بیریلیشی و عیاللر اوچون ساتیش بازارلری یرهتیلیشی محلی اقتصاد رواجلنیشی و مستحکملنیشیده کوپینچه حصه قوشه آلیشلری ممکن.
بو توغریده اقتصادی مسئلهلر بیلرمانلریدن الماسه حبیبیگه کوره، سبزهوات ایکیش، باغچه ایشلری و تاووقچیلیک بولیملریده عیاللر اورنی کوپ دیر. «ایکینچیلیک بولیمیده عیاللر فعالیتی آزیق-آوقت خوفسیزلیگی مستحکملنیشی و عایلهلر اقتصادی رواجلنیشیگه سبب بولهدی و بو اوریننینگ کوچلنیشی اوچون زراعتی تعلیملر امکانیتی، کیچیک قرضهلر و ساتیش اوچون مناسب بازار یرهتیلیشی جودهیم مهم و ضرور دیر.»
شونینگدیک سمنگان ایکینچیلیک ریاستی مسئوللرینینگ ایتیشلریچه، سونگی ییللرده موسسهلر همکارلیگی بیلن زراعت بولیمیده فعالیت قیلهدیگن عیاللرنینگ قوللب-قوتلنیشی اوچون بیر قطار برنامهلرنی یولگه قوییب و بو بولیمده اولرنینگ کوپراق حصه قوشیشی مقصد سعیوحرکتلرنینگ دوامی بار.
سمنگان ایکینچیلیک ریاستینینگ زراعتی ایشلری بوییچه آمری خلیل کریمینینگ ایتیشیچه: «ایکینچیلیک بولیمیده فعال عیاللر سانی توغریسیده انیق معلوماتیمیز یوق، بیراق عیاللر ایکینچیلیکنینگ تورلی بولیملریده فعالیت قیلماقده و اولردن قطاری موسسهلر همکارلیگیده محرملری بیلن بیرگه تعلیمی ساحهلرگه تانیشتیریلهدیلر. اولرگه اوی باغچهسی قوریلهدی همده سبزهوات اوروغی بیلن زراعتی کیتلر ترقهتیلهدی و تخنیکی تعلیملر بیریلهدی.»
قویاش آهسته آهسته باتماقده، وحیده ایسه اوی باغچهسیدهگی باشقه بیر کونلیک محنتنی موفقیت بیلن یکونلماقده. امید هیدینی بیرگن اوشبو باغچه، قیینچیلیکلر آرهسیده اونینگ اوچون برقرارلیک و تلاش رمزی دیر.
