ایکینچیلیک و چاروهچیلیک کوپراق ایرککلرگه عاید ایش حسابلنسهده، بیراق افغانستاننینگ تورلی ولایتلریده عیاللردن کوپ قطاری اوشبو بولیملرده ایش بیلن شغللنگن. مذکور عیاللرنینگ ایتیشلریچه، ایکینچیلیک و چاروهچیلیک بولیمیده ایشلش بیلن درآمد قولگه کیلتیریب و عایلهلرینینگ اقتصادیگه یاردم بیره آلگنلر.
عیاللر اوچون ایش امکانیتلری چیکلنگن غور ولایتیده، عیاللردن قطاری کیچیک ییرلر و آز امکانیتلردن فایدهلنیش بیلن اوزلری همده عایلهلرینینگ خرهجتینی تامینلش مقصد سعیوحرکت قیلماقدهلر.
غور دهگی ایکینچیلردن فرزانه ایوبی، هنگ ایکیش و تاووقچیلیک کیچیک فارملرینی آچیش بیلن، جمعیتده ایشلش و درآمد قولگه کیلتیریش امکانیتینی یرهتگن. غور ولایتی دولتیار تومنیده حیات کیچیرهدیگن فرزانهنینگ ایتیشیچه: «حکومت اوزگرگنی و ایشیمنی قولدن بیرگنیمدن کیین، ییغگن پولیم بیلن بیر ایشنی باشلماقچین بولدیم. عیاللر یالغیز زراعت و تجارت بولیملریده فعالیت قیله آلهدی. فرصتدن فایدهلنماقچین بولدیم. شخصی قریب سکیز جریب ییریم بار و تورت ییل بولهدی که ایکینچیلیک بیلن شغللنگنمین.»
او، قریب ۴۰ مینگ هنگ بتهسینی سکیز جریب شخصی ییریگه ایکیب و تورت ییل اوتگنیدن کیین، حاضر اونینگ شیرهسینی قولگه کیلتیرگن. اوشبو شیرهلرنی ساتیش اونینگ خودکفالیگی و عایله نیازلرینی تامینلش گه یاردم بیرگن.
فرزانهنینگ ایشانچیگه کوره، ایکینچیلیک یالغیز ایرککلرگه تیگیشلی بیر ایش ایمس، بلکیم عیاللر هم بو بولیمده فعال شکلده حصه قوشه آلهدیلر. «بو ایشده ایرکک و عیال بولیشنینگ بیر فرقی یوق. امکانیت بولیب و بو توغریده قیزیقسه، ایش قیله آلهدی. بیر قطار ایش بار که ایرککلر هم قیله آلمهیدی و عیاللرگه تیگیشلی بولهدی شو رقم ایکینچیلیک هم اونچه قیین بیر ایش ایمس. درآمد اوچون یخشی بیر بولیم دیر.»
شوندهی بیرحالده، هنگ ایکیش بولیمیده عیاللردن قطاری بیلن فعالیت قیلهدیگن غور دهگی عیاللردن باشقه بیری زیور محمودیگه کوره، آتهسینینگ حمایتی بیلن بو ایشگه باشلهگن. «سونگی اوزگریشلردن کیین تحصیلگه دوام بیره آلمهدیم و آتهمنینگ حمایتی بیلن ایکیش ایشیگه باشلهدیم و اوچ ییلدن بیری ایکدیم و تورتینچی ییلده حاصل قولگه کیلتیردیم. شونینگدیک بو یول آرقهلی عایله اقتصادینینگ بیر بولیمینی تامین قیله آلدیم. هر قنچه شیره توپلهگنیمده اونچه درآمد کوپهیهدی.»
او، اوزیگه درآمد منبعسینی یرهته آلگنیدن خورسندلیک قیلیب و ایتیشیچه: «اوزیمگه بیر درآمد منبعسینی یرهته آلگنیم و عایلهمنینگ خرهجتلریدن بیر بولیمینی تامین قیله آلگنیم اوچون خورسندمین. نهادلردن بیزلرنینگ قوللب-قوتلشلرینی سورهیمین.»
رسمی و نارسمی بیرقطار رقملر اساسیده، افغانستان دهگی عیاللردن بیر یریمدن ایکی میلیون تهسی، مستقیم و غیرمستقیم شکلده ایکینچیلیک و چاروهچیلیک بولیملریده فعالیت قیلماقده. مذکور عیاللر سیگیر و ایچکی ییتیشتیریش، تاووقچیلیک، لبنیات پروسس قیلیش، باغدارلیک، ایسیقخانهلر، زعفران، اریچیلیک و قول صناعتی کبی بولیملرده ایشلب و عایلهلر اقتصادیده مهم رول اوینهیدیلر.
دنیا بانکینینگ معلوماتی اساسیده، افغانستان ایش کوچینینگ بویوک بولیمی یعنی جمعیتدن ۷۰ فایزی، قیشلاق منطقهلریده ایکینچیلیک و چاروهچیلیک بیلن شغللنگن که مذکور ایش کوچینینگ اصلی بولیمینی عیاللر و قیزلر تشکیل بیرهدی.
بو بیلن بیرگه، افغانستان دهگی دهقان عیاللر بیر قطار قیینچیلیکلر جملهدن ساتیش بازارلردن فایدهلنه آلمسلیک، تخصصی تعلیملر آزلیگی و قویی درآمد بیلن روپهرهلر.
