تشقی ایشلر وزیرلیگی سوزلاچیسی نینگ اورین باسری حامد تهذیب نینگ سلام‌وطندارگه ایتیشیچه، شانگهای ییغینی ایرته “چهارشنبه” شانگهای تشکیلاتی‌گه عضوی بولگن مملکت‌لرنینگ تشقی ایشلر وزیرلرینی حضوری بیلن تاجیکستان باشکنتی دوشنبه شهریده یولگه قوییله‌دی.
حامد تهذیب نینگ کوپه‌یتیریشیچه، مملکت تشقی ایشلر وزیری محمدحنیف اتمر اوشبو ییغینده اشتراک قیلیش اوچون تاجیکستان‌گه بارگن و بو تشکیلات نینگ ۴- ییغینیده افغانستان جاری وضعیتی خصوصیده بحث ایتیله‌دی.
تشقی ایشلر وزیرلیگی نینگ ایتیشیچه، اوشبو ییغینده افغانستان نینگ شانگهای تشکیلاتیده‌گی عضویتی، تروریسم گه قرشی اوشبو تشکیلات نینگ افغانستان بیلن بولگن قوشمه مبارزه‌سی، افغانستان امنیتی وضعیتی و اونینگ منطقه دهگی تاثیری خصوصیده بحث قیلینیشی ممکن.
عین‌حالده، سیاسی ایش بیلرمان‌لردن بیرقطاری نینگ ایتیش‌لریچه، افغانستان شانگهای تشکیلاتی‌گه عضو بولگن صورتده، مملکت نینگ منفعتی گه دیر.
سیاسی ایش بیلرمان‌لردن بیری محب‌الله شریفی نینگ ایتیشیچه، افغانستان نینگ شانگهای تشکیلاتی‌گه عضو بولیشی منطقه اقتصادی‌گه وصل بولیشی و اونینگ چیککه‌سیده امنیتی و سیاسی نقطه‌نظردن افغانستان‌نی انسجام بولیشی‌گه سبب، بوله‌دی.
ایتیلیشیچه، روسیه، چین، اوزبیکستان، تاجیکستان، پاکستان، قرقیزستان و هندوستان مملکت‌لری شانگهای تشکیلاتی گه اعضا دیر و افغانستان، ایران و باشقه بیرقطار مملکت‌لرنینگ تشقی ایشلر وزیرلری ناظر صفتیده اوشبو ییغینده اشتراک قیله‌دی.
