آمریکا ملی خوفسیزلیک کینگشی نینگ اعلام قیلیشیچه، افغانستان ده آمریکا حربی کوچلری نینگ کمه‌یش بویروغی صادر ایتیلگن.
اوتگن کون (سه‌شنبه ۲۷- عقرب) آمریکا ملی خوفسیزلیک کینگش مصلحتچیسی رابرات اوبراین، خبرچیلر بیلن صحبت اوتکزیب ایتیشیچه، آمریکا مدافعه وزیرلیگی سرپرستی کریستوفر میلر افغانستان و عراق ده آمریکا حربی کوچلری نینگ کمه‌یشی توغریسیده بویروغ صادر قیلگن.
آمریکا نینگ حاضر افغانستان ده ۴۵۰۰ عسکری بار و مذکور بویروغ اساسیده، مذکور حربی‌لردن یریمی افغانستان نی ترک قیلیشی ممکن.
آمریکا مدافعه وزیرلیگی سرپرستی کریستوفر میلر بیر ییغین اوتکزیب ایتیشیچه، افغانستان و عراق ده کیله‌جک ییل ۱۵- جنوری آیی گچه آمریکا حربی‌لری نینگ سانی ۲۵۰۰ کیشی گه کمه‌یشی ممکن.
آمریکا نینگ حاضر افغانستان ده ۴۵۰۰ عسکری بار و مذکور بویروغ اساسیده، مذکور حربی‌لردن یریمی افغانستان نی ترک قیلیشی ممکن.
او پنتاگون ده اوتکزگن ییغینیده ایتیشیچه، افغانستان و عراق مملکت‌لریده آمریکا حربی‌لری و تینچ‌اهالیسی هیچ بیر ضرر کورمه‌سدن بو مملکتلرنینگ ترک قیلیشه‌دی.
کریستوفر میلر نینگ خبرچی‌لرگه ایتیشیچه، آمریکا حربی‌لری نینگ چیقیشی خصوصیده افغانستان حکومت رهبرلیگی و ناتو باش کاتبی ینس استولتنبرگ بیلن سوزلشگن.
اوتگن کون (سه‌شنبه ۲۷- عقرب) ناتو باش کاتبی ینس استولتنبرگ آمریکا حربی‌لری افغانستان نی ترک قیلیشی خصوصیده عکس‌العمل بیلدیریب و افغانستان دن شاشلینچ شکلده چیقیش آغیر تمام بولیشی ممکن دیگن ایدی.
ناتو باش کاتبی نینگ ایتیشیچه، افغانستان دن شاشلینچ شکلده چیقیلگن صورتده، مذکور مملکت قیته‌دن دنیا ترورچیلری نینگ تینچ اویه‌سیگه اوزگریشی ممکن. اونینگ ایتیشیچه، افغانستان دن شاشلینچ شکلده چیقیلگن بیرحالده، مذکور مملکتده داعش قیته‌دن جان آلیشی ممکن.
ناتو باش کاتبی نینگ کوپه‌یتیریشیچه، آمریکا حربی‌لری افغانستان دن چیققن صورتده، ناتو افغانستان امنیتی کوچلری گه مالی یاردم، حربی جهاز و مصلحت بیریش گه دوام بیریشی ممکن.
او بوندن آلدین، افغانستان ده ۱۲ مینگ چیت‌ایللیک حربی کیم اولردن یریمی نی آمریکا حربی‌لری تشکیل بیریشی نی ایتگن ایدی.
او ینه بیر مرته اورغولیشیچه، برچه‌میز بیرلیکده افغانستان کیلگن‌میز و برچه‌میز بیرلیکده افغانستان نی ترک قیله‌میز.
اونگه کوره، بیزلر (ناتو) ۲۰۲۴- ییل گه قدر افغانستان گه هر تامانلمه یاردم بیره‌میز.
استولتنبرگ نینگ ایتیشیچه، ناتو و اونینگ بیرلشیک‌لری افغانستان تینچلیک پروسه‌سیدن حمایت قیله‌دی و «بو پروسه‌سی نینگ بیر بولیمی صفتیده، اوزیمیزنی تیارله‌گن‌میز.»
شونینگدیک او بوندن آلدین هم، افغانستان ده ناتو نینگ حربی حضوری خصوصیده هر قنده‌ی اوزگریش شرط‌لرگه باغلیق بولگنی نی ایتگن ایدی.
نیچه پیت آلدین آلمان مدافعه وزیری آنگرت کرامپ کارن بائر، افغانستان دن چیقیش خصوصیده هر قنده‌ی قرار شرط‌لرگه باغلیق بولیشی کیره‌ک دیگن ایدی.
عین حالده، اوتگن کون (سه‌شنبه ۲۷- عقرب) جمهورلیک ریاست سوزلاوچیسی صدیق صدیقی، چیت‌ایللیک کوچلر افغانستاندن چیقیشی حقیده ایتیشیچه، افغانستان امنیتی کوچلری نینگ یانیده چیت‌ایللیک کوچلرنینگ حضوری «کیره‌کلی» دیر.
اونینگ کوپه‌یتیریشیچه، عملیات‌لردن ۹۸ فایزی افغانستان امنیتی کوچلری آرقه‌لی یولگه قوییلهدیگن بیرحالده، آمریکا و ناتو کوچلری نینگ حضوری کیره‌کلی دیر.
اونگه کوره، حاضر ناتو کوچلریدن قطاری افغانستان امنیتی کوچلری گه تعلیمات و یاردم بیرماقده.
آمریکا حربی‌لری افغانستان نی ترک قیلیش خصوصیده بویروغ صادر ایتیلگن بیرحالده، جمهورلیک ریاستی نینگ ایتیشیچه، مملکت جمهوررئیسی محمداشرف غنی، آمریکا مدافعه وزیرلیگی سرپرستی کریستوفر میلر بیلن تلیفون آرقه‌لی سوزلشگن.
جمهورلیک ریاست سوزلاوچیسی توییتر صحیفه‌سیده یازیشیچه، ایکی تامان تینچلیک سوزلشوولری و ایکی مملکت آره‌سیده‌گی علاقه‌لر خصوصیده سوزلشگن.