جمهورلیک ریاست بیرینچی اورین‌باسری امرالله صالح نینگ ایتیشیچه، جاری هفته‌ده یولگه قوییله‌دیگن استانبول ییغینی ده اوچ آجندا پیش‌بین‌لیک قیلینگن.
جمهورلیک ریاست بیرینچی اورین‌باسری بوگون (یکشنبه ۲۲- حمل) جمهوریت تیزیمی‌دن حمایت قیلیش اوچون کوهدامن اهالیسی آرقه یولگه قوییلگن ییغیلیشی گه بونده‌ی بیانات بیرگن. جناب صالح نینگ ایتیشیچه، ارزشلر، آتیش‌کیسین و تینچلیک حکومتی ایجاد ایتیلیشی اوستیگه کیلیشیش، استانبول ییغینی گه پیش‌بین‌لیک قیلینگن آجندالردن دیر.
جمهورلیک ریاست بیرینچی اورین‌باسری گه کوره، افغانستان تینچلیگی بوییچه آمریکا خاص نماینده‌سی کابل ده قیلگن سونگی سفریده، استانبول ییغینی نینگ اوشبو اوچ آجنداسی توغریسیده افغانستان دولت رسمی‌لری بیلن سوزلشگن. صالح نینگ ایتیشیچه، اصل‌لر و ارزشلر اوستیگه کیلیشیش بو معنا گه دیر کیم طالبان افغانستان نینگ طالبانی بولمه‌سینی قبول قیلیش گه مجبور دیر، بیراق طالبان افغانستان یوره‌گیده بیر جز صفتیده اهالی نینگ یانیده تینچ بیر حیات کیچیره آله‌دی.
جناب صالح نینگ ایتیشیچه، بو اصل‌لر اوستیگه کیلیشیش قنچه زمان آلیشی بیللی ایمس، بیراق طالبان افغانستان نینگ بیر جزء بولگن‌لرینی تن آلمه‌ی و بو گروه نینگ کلیتی اوستیگه اورغوله‌گن بیرحالده، باشقه موضوعلر اوستیده‌گی مذاکره بیر اَدیم هم آلغه کیتمه‌یدی.
جمهورلیک ریاست بیرینچی اورین‌باسری آتیش کیسین توغریسیده ایتیشیچه، طالبان قبول قیلیش‌لری کیره‌ک کیم اهالی حاضرگی پروسه‌دن حمایت قیلیشی نی ایسته‌گن صورتده، آتیش کیسین قیلسین‌لر.
امرالله صالح نینگ بیاناتی اساسیده، طالبان نینگ کتته قورقوولریدن بیری آتیش کیسین دیر کیم زوروانلیک نی کوچ قوتی صفتیده قول دن بیرگن صورتده، افغانستان دولتی و دنیا جماعه‌چیلیگی اولر بیلن جدی سوزلشمه‌سی ممکن.
طالبان گه خطاب اونینگ ایتیشیچه: «مین بوگون جمهوررئیس اورین باسری صفتیده طالبان گه ایته‌من کیم، آتیش کیسین بولگن صورتده، مذاکره نینگ جدیتی کم بولمه‌یدی. بیزلر جدی مذاکره گه متعهدمیز و سیزلر آتیش کیسین قیلیب و اولدیریش‌دن قول تارتگن صورتده، تینچلیک سوزلشوولری هر بیر ایرکک و عیال نینگ یوره‌گیده جای آلیب و بو پروسه حمایت بوله‌دی.»
جمهورلیک ریاست بیرینچی اورین‌باسری بیاناتی نینگ دوامیده، طالبان نینگ ۵ مینگ محبوسی قوییب یوباریلگنی نی حکومت نینگ کتته خطالریدن بیری دیب ایتیشیچه، کیله‌جکده هیچ قچان بونده‌ی بیر خطا قیلمهیدیلر. اونگه کوره، مذکور محبوسلر آره‌سیده مخدره ماده نینگ کتته قاچاقچی‌لری هم موجود ایکن کیم طالبان گه رشوت بیریش بیلن، مذکور گروه اعضالری نامی آستیده قوییب یوباریلگن.
شونینگدیک امرالله صالح کیلهجک حکومت حقیده ایتیشیچه، استانبول ییغینیده بو توغریده هر قنده‌ی کیلیشوو صورت تاپگن بیرحالده هم قیته‌دن مصلحتی لویه جرگه یولگه قوییلیشی بیلن اهالی نینگ تورلی قشرلری بیلن بحث قیلینه‌دی.
