اسلام امیرلیگی ایچکی ایشلر وزیری سراجالدین حقانی، خلقارا ساغلیقنی سقلش تشکیلاتینینگ شرقی مدیترانه بوییچه منطقهای اداره باشلیغی حنان بلخی بیلن افغانستان طبیات توزیمی کوچلنیشی همده ساغلیقنی سقلش همکارلیکلر کوچهیشی حقیده صحبت قیلگن.
ایچکی ایشلر وزیرلیگی سوزلاوچیسی عبدالمتین قانع، بوگون (۱۴-سرطان، یکشنبه)، اکس صحیفهسیده بیر بیانیه ترقهتیب، مذکور اوچرهشووده شونینگ ملک سلمان جمغرهسی وکیلی، یونیسف بوییچه منطقهای اداره باشلیغی و قطر همده بیرلشگن عرب امیرلیگی ایلچیلرینینگ اشتراک قیلگنینی یازگن.
بیانیه اساسیده، ایکی تامان افغانستان ساغلیقنی سقلش توزیمی کوچلنیشی، ساغلیقنی سقلش همده پولیو کسللیگی واکسیناسیون دستورلری بوییچه هماهنگلیکلر و همکارلیکلر کوچهیشی حقیده صحبت قیلگنلر.
بو اوچرهشووده حقانینینگ ایتیشیچه، حاضر افغانستان ده طبی خذمتلر کوچهیشی اوچون مناسب امکانیت یرهتیلگن. او، ساغلیقنی سقلش بولیمیدهگی بار قیینچیلیکلرگه اشاره قیلیب، دوالنیش خذمتلر یخشیلنیشی مقصد قوشمه همکارلیک ضرورلیگیگه تاکیدلهگن.
شونینگدیک اسلام امیرلیگی ایچکی ایشلر وزیرینینگ اورغولشیچه، افغانستان یشاوچیلریگه ساغلیقنی سقلش خذمتلری کورسهتیلیشی سیاسی ملاحظهلردن اوزاق و انسانی نیازلر اساسیده عملگه آشیریلیشی کیرهک.
افغانستاننینگ ساغلیقنی سقلش بولیمی دههلردن بویان بیر قطار قیینچیلیکلر جملهدن دوالنیش مرکزلر، متخصص شفاکارلر، دارو و طبی امکانیتلر کملیگی بیلن روپهره دیر. خلقارا ساغلیقنی سقلش تشکیلاتی، یونیسف و خلقارا نهادلر و یاردم بیرووچی مملکتلردن قطاری، افغانستان ده واکسیناسیون و دوالنیش دستورلریدن حمایت قیلگن.
