هلمند ساغلیق‌نی سقلش باشلیغی نقیب‌الله فاتح، اسلام امیرلیگی رهبری‌نینگ حکمی اساسیده، اوشبو ولایت‌نینگ گرشک تومنیده بیر کسلخانه‌نینگ قوریش ایشی باشلنگنیدن خبر بیره‌دی.
هلمند ساغلیق‌نی سقلش باشلیغی‌نینگ ایتیشیچه، اسلام امیرلیگی حاکمیتیدن سونگ بو ولایتده طبی مرکزلر سانی کوپه‌یگن.
شو بیلن بیرگه، هلمند ولایتی گرشک تومنی بازار نو« و «دهمزنگ» حدودلری اهالیسی، تورر جای‌لریگه یقین زمانه‌وی مرکزلر یوقلیگینی ایته‌دیلر. اولرنینگ ایتیشیچه، کسللرینی دوالش اوچون لشکرگاه شهریده‌گی کسلخانه گه آلیب باریشه‌دی.
گرشک تومنی بازار نو و دهمزنگ حدودلریده یشاوچی نصرت و عبدالقیوم، بو کسلخانه قوریلیشی بیلن محل یشاوچیلری‌نینگ طبیات ساحه‌سیده بولگن قیینچیلیک‌لری حل ایتیلیشیگه امید بیلدیریشه‌دی.
هلمند ولایتی کجکی تومنی زمینداور حدودی یشاوچیلری هم، منطقه‌لریده یخشی طبی خذمت کورسه‌تیلیشینی سوره‌یدیلر. اولرنینگ ایتیشیچه، منطقه‌لریده یخشی طبی خذمت کورسه‌تیلمسلیگی سببلی، یشاوچیلر تورلی قیینچیلیک بیلن روپه‌ره دیر.
کجکی تومنی زمینداور حدودی یشاوچیسی بولگن عبدالحبیب و غلام یحیی، تورر جایلری یقینیده زمانه‌وی جهازلر بیلن تأمینلنگن مرکزلر یوقلیگی، اقتصادی قیینچیلیک و آمبولانس یوقلیگی اساسی قیینچیلیک‌لردن بولگنینی ایته‌دیلر.
طبی خذمت‌لرنی کینگه‌یتیریش فقط کسلخانه‌لرنینگ قوریلیشیگه چیکلنیب قالمه‌یدی؛ بلکی اوزاق حدود یشاوچیلری، آمبولانس یوقلیگی و کسللرنی وقتیده کسلخانه گه ییتکزه آلمسلیک، طبی خذمت‌لردن فایده‌لنیش ساحه‌سیده مهم بوشلیق‌لردن حسابلنه‌دی.
