بالهلر باغچهسیده بالهلرنینگ کولگی آوازی بوتون محیط گه ترهلگن. اولرنینگ کیچیک قوللریدهگی رنگلی قلملر قاغاز اوستیده سیرپینیب، تورلی شکللر و رسملر چیزماقدهلر؛ بیر گروه بالهلر تعلیمی اویینلر بیلن بند، باشقهلری ایسه اوقیتووچیلر رهبرلیگیده ترتیب، همکارلیک و دوستلیکنینگ ایلک سباقلرینی اورگنماقده.
کابل شهریدهگی ایریم عایلهلر فرزندلرینی بالهلر باغچهسیگه بیریشنی اولرنینگ رواجلنیشی و مکتب گه تیارگرلیگیگه یاردم بیروچی تنلاو صفتیده کوریشهدی.
۳۵ یاشلی نجلا، قریب بیر ییلدن بیری اوغلی ارسلاننی بالهلر باغچهسیگه یوبارهدی و ۲۶ یاشلی لینا ایسه اوزی و تورموش اورتاغی ایکیلهسی هم ایشلهیدی فرزندلری هم باغچه گه بارهدی. اولرنینگ فکریچه، بالهلر باغچهسی محیطی فرزندلرینی ینهده مستقلراق قیلگن و اولرنینگ ملاقات دریجهسینی هم یخشیلهگن.
نجلا شوندهی دییدی: «مینینگ فکریمچه، بالهلر باغچهسی محیطی فرزندیمگه ایجابی تأثیر کورستدی. او اولگیگه قرهگنده مستقلراق بولدی، تینگداشلری بیلن یخشیراق ملاقات قیله آلهدی. ترتیب-انتظام و مسئولیت حسی آشدی، شونینگدیک، اونینگ اورگنیشگه بولگن قیزیقیشی هم آرتدی.»
فرزندی بالهلر باغچهسیگه بارهیاتگن عیاللردن باشقه بیری لینا گه کوره: «مین بالهلر باغچهسیدهگی خوفسیزلیک درجهسی، ترتیب-انتظام و تعلیم دستورلریدن کتته درجهده ممنون من. باغچه محیطی تینچ، ترتیبلی و بالهلرنینگ تعلیم آلیشی اوچون قولی. فعالیتلر منتظم روشده تشکیل ایتیلگن بولیب، اولر بالهلرنینگ هر تامانلمه رواجلنیشیگه یاردم بیرهدی.»
بعضی عایلهلر فرزندلرینی حیاتینینگ دستلبکی ییللریده اویده تربیهلشنی افضل کوریشهدی.
۳۲ یاشلی ذکیه قیومی و ۳۹ یاشلی مریم، هرایکیسی هم ایکی فرزندنینگ آنهسی، فرزندلرینینگ عایلهسی یانیده بولیشی و اولرنینگ تعلیم-تربیهسیده اشتراک ایتیشنی مهم دیب بیلگنلری اوچون، بالهلرینی اویده پرورش قیلیشنی افضل کوریشلرینی ایتیشهدی.
ذکیهنینگ ایتیشیچه: «فرزندلریم حیاتینینگ ایلک ییللریده عایله بغریده بولیشلرینی، عایلهوی تربیه آلیشلرینی و اولرنینگ تعلیم همده تربیهسیده اوزیم هم فعال اشتراک ایتیشنی ایستهیمن.»
مریم هم شوندهی دییدی: «بندلیگیم و جوده چرچهشیمگه قرهمی، فرزندلریمنینگ تعلیم-تربیهسیده اولر بیلن شغللنهمن و برچه مسئولیتنی اوزیم زممگه آلهمن. مینینگ فکریمچه، اوی شرایطیده اولرنینگ آوقتلنیشی، کییم-کیچگی، تربیهسی و باشقه احتیاجلریگه یخشیراق اعتبار بیره آلهمن.»
خدیجه خاموش، کابل شهریده خصوصی بالهلر باغچهلریدن بیریده اوقیتووچی، اوز ایش تجربهسیگه تیهنیب ایتیشیچه، بالهلر گروه فعالیتلریده و تینگداشلری بیلن ملاقاتده بولیش آرقهلی استه-سیکین فعالراق، مستقلراق و اجتماعیراق بولیب بارهدی. او شوندهی دییدی: «شخصی تجربهمدن ایتهدیگن بولسم، بیزده دستلب تارتینچاق، اوزیگه ایشانچی پست و اویتچن بالهلر بولگن. بیراق اولرنی استه-سیکین گروه فعالیتلریگه جلب قیلیب، باشقه بالهلر بیلن ملاقات قیلیشلری اوچون شرایط یرهتگنیمیزدن سونگ، اولر ینهده فعالراق، مستقلراق و اجتماعیلشگن بالهلر گه ایلنهدیلر.
باشقه تاماندن، کابل شهریده بالهلر باغچهلریدن بیریده روانشناس و خادم بولیب ایشلاوچی عبدالجلیل امرخیلنینگ ایتیشیچه، فعال و زمانهوی بالهلر باغچهسیده تربیه آلیش بالهنینگ اوزیگه بولگن ایشانچینی آشیریشی ممکن همده اونده خوفسیزلیک حسی، مستقللیک، ماسلشووچنلیک، برداشلیک و معمالرنی حل قیلیش کونیکمهلرینی رواجلنتیرهدی. او شوندهی دییدی: «بو محیط رواجلنیشدهگی کیچیکیشلر، نطق بوزیلیشلری، خُلق-اتوار معمالری، خواطر یا کی رواجلنیش بوزیلیشلرینینگ دستلبکی بیلگیلرینی ایرته انیقلش امکانینی بیرهدی. اگر بوندهی حالتلر اوز وقتیده انیقلنیب، تیگیشلی چارهلر کوریلسه، بو بالهنینگ خلق-اتواری، نطقی و اجتماعیلشوویده کتته ایجابی اوزگریشلرنی یوزه گه کیلتیریشی ممکن.»
افغانستان اسلام امیرلیگی احصائیه و معلومات ادارهسی، قویاش ۱۴۰۳ ییلنینگ ایکینچی چارهگی گزارشی معلوماتی گه کوره، افغانستان بویلب ۱۷۰ ته دولت و خصوصی بالهلر باغچهسی فعالیت یوریتماقده. گزارش گه کوره، بو باغچهلرده آلتی مینگ ۱۷۷ نفر باله تربیهلنماقده، اولردن ۳ مینگ ۳۳۷ نفری اوغیل بالهلر و ایکی مینگ ۸۴۰ نفری قیز بالهلر دیر. شونینگدیک، مملکتده ۳۸ ته خصوصی بالهلر باغچهسی و کودکلر پرورش مرکزلری هم فعال بولیب، اولرده بیرمینگ ۸۶۰ نفر باله پرورش قیلینماقده.
