افغانستان انسان حقلری ایرکین کمیسیونی ۱۲ یاشدن یوقاری قیز باله‌لرنینگ ترانه اوقیشی معارف وزیرلیگی تامانیدن منع ایتیلیشی گه عکس‌العمل کورسه‌تیب ایتیشیچه، باله‌لرنینگ حقلری و ایرکین‌لیگی گه هر قنده‌ی چیکلاو یره‌تیش انسانی حقلر اصولی و باله‌لردن حمایت قیلووچی قانون گه قرشی دیر.
بوگون (پنجشنبه ۲۱- حوت) انسان حقلری ایرکین کمیسیونی بیر اعلامیه ترقه‌تیب ایتیشیچه، تعلیمات آلیش، سوز ایرکین‌لیگی و هنری مهارت‌لرگه قول تاپیش باله‌لرنینگ اساسی و دستلبکی حقلریدن دیر. مذکور کمیسیون نینگ اعلامیه‌سی اساسیده، برچه قیز و ایرکک باله‌لر قانونی چارچوبه‌سیده حقلریدن تینگ شکلده استعمال قیله آله‌دی.
انسان حقلری ایرکین کمیسیونی نینگ اورغولشیچه، باله‌لرنینگ ایرکین‌لیگی و حقلری گه هر قنده‌ی چیکلاو یره‌تیش انسان حقلری، باله حقلری کنوانسیونی و افغانستان ملی قانون‌لری اینیقسه اساسی قانون و باله‌لردن حمایت قیلووچی قانون نینگ عمومی اصل‌لریگه قرشی دیر.
شونده‌ی بیرحالده، اوتگن کون معارف وزیرلیگی بیر اعلامیه آرقه‌لی ایرککلر موجود بولگن مراسم‌لرده یاشی ۱۲ دن یوقاری باله‌لرنینگ حضوری و ترانه اوقیشی نی منع قیلدی. مذکور مکتوب گه کیلیشیچه، قیز اوقووچیلر یالغیز عیاللر موجود بولگن مراسم‌لرده ترانه اوقیشی ممکن.
اوتگن کون معارف وزیرلیگی سوزلاوچیسی نجیبه آرین بو مکتوب نی تصدیق‌لش بیلن سلام‌وطندارگه ایتیشیچه، اوقووچیلر و اولرنینگ اولیالریدن قطاری نینگ شکایتی دن کیین بونده‌ی قرار آلینگن.
