مملکت اکثریت یشاوچیلری اوچون تلفون و اینترنتدن فایدهلنیش، کوندهلیک حیاتلرینینگ بیر قسمی گه ایلنگن؛ بیراق کوپینچه حدودلرده مخابرات و اینترنت خذمتلری پسلیگی یشاوچیلرنی ایریم قیینچیلیک بیلن دوچ قیلگن.
بونگه قوشیمچه، بیرقطار مخابرات ترماقلریدن فایدهلنوچیلر، اینترنت و علاقه قوریش اوچون نرخلر یوقاریلیگیدن شکایت قیلهدی. اوشبو گزارشده ۱۷ ولایتدن ۱۸ کیشی بیلن صحبت قیلینگن.
بدخشان ولایتی راغستان تومنیدن بولگن احمدشهاب و پنجشیر ولایتی حصهاول تومنی یشاوچیسی اسلامالدین رهیاب سلاموطندار بیلن صحبتده ایتیشلریچه، بو تومنلرده مخابرات ترماقلرینینگ سیگنالی ضعیفلیگی یشاوچیلر علاقه قوریش و اینترنتدن فایدهلنیش اوچون ایریم قیینچیلیک بیلن دوچ دیر.
احمدشهاب شوندهی دییدی:«انده-سنده علاقه اوزیلیب قالهدی و او تامان تاووشی یخشی ایشیتیلمهیدی. اینترنتدن بیر نرسهنی کورماقچی بولسهی یا کی بیران کیشی گه اوزهتماقچی بولسهی ایش بیرمهیدی و قیینچیلیک بیلن دوچ بولهمیز.»
اسلامالدین رهیاب هم شوندهی دییدی: «پنجشیر ولایتیده بیز یشهیاتگن حدودلرده مخابرات ترماقلری جوده ضعیف ایشلهیدی. حتا عادی قونغیراقلرده تاووش ایشیتیلمهیدی، اینترنت ایش بیریش اوز جاییده. انده-سنده کیچه تاماندن آنتنلر بوتکول اوزیلهدی.»
باشقه تاماندن، مخابرات ترماقلرینینگ فایدهلنوچیلری اینترنت صفتی پسلیگی و نرخی یوقاریلیگیدن تنقید قیلیشهدی.
بلخ ولایتی مرکزی مزارشریف شهری یشاوچیسی بولگن سلیمه گه کوره: «اینگ کوپ آنلاین درس اوقیش پیتیده قیینچیلیک بیلن دوچ بولهمیز. بیر جلسهنی پایلشیش پیتیده بولسک اینترنت یخشی ایشلمهیدی و تاووش ایسه اوزیلهدی.»
بغلان ولایتی پلخمری شهریدن بولگن صالحه محمدی هم شوندهی دییدی: «اوزیم طلبهمن اینترنت و علاقه قوریش نرخلری یوقاری و قوربیم ییتمهیدی اینیقسه درآمدی کم عایلهلر یا کی طلبهلرنینگ. مخابرات ترماقلریدن نرخلرنی پس توشیریشنی ایستهیمیز و اونی یانیده اینترنت و علاقه قوریش صفتلری توغریسیده دقت قیلسین.»
تخنیک ساحهسیده بیلرمانلرنینگ ایتیشیچه، مخابرات خذمتلرینینگ صفتی پسلیگی فقط اولرنینگ آنتنلری فاصلهسیگه چیکلنیب قالمهیدی، بلکی تخنیک، مخابرات آست قوریلمهلریدهگی قیینچیلیک، اوزاق حدودلرنی قاپلهی آلمسلیکنی اوز ایچیگه آلهدی.
تخنیک ساحهسیده بیلرمان قریب آرین، مملکتده مخابرات ترماقلرینینگ آست قوریلمهلری کوچهیتیریلیشی گه تأکید ایتهدی. او شوندهی دییدی: «مخابرات ترماقلری یخشیلنیشی اوچون فقط آنتن قوریش ییترلی ایمس؛ ترماقلرنینگ آست قوریلمهلری کوچهیتیریلسه. اوزاق حدودلرده کوپراق آنتنلر قوریلسه و شبکه ظرفیتی اینیقسه فایبر نوری رواجلنتیریلسه. ایسکیرگن اوسکونهلر ینگیلشتیریلیب و زمانهوی تکنالوژیلردن فایدهلنیلسه.»
شو بیلن بیرگه، افغانستان مخابرات خذمتلرینی ترتیب گه سالیش اداره (اترا) مسئوللری، مملکت اوزاق حدودلریده مخابرات خذمتلرینینگ صفتی یخشیلنیشی مقصدیده سعی-حرکت قیلینهیاتگنیدن سوز یوریتهدیلر.
مذکور اداره سوزلاوچیسی جلالالدین شمس شوندهی دییدی: «اوزاق حدودلرده حاضر ۲ جی خذمت کورستماقدهمیز بیراق تخنیکی قیینچیلیک بار؛ چونکی ستلایت آرقهلی خذمت کورستیلهدی.»
برچهسی بیلن اترا معلوماتیگه کوره اوشبو قویاش ییلده اوزاق حدودلرده یشاوچیلرنینگ مخابرات خذمتلریدن فایدهلنیش مقصدیده، ۱۲ ولایتنینگ ۱۶ اولسوالیگیده ۱۰۸ میلیون افغانی عوضی گه ۱۶ ته آنتن قوریلگن.
