اسکین درهسی، قریب ۲۰ مینگ نفر اهالی بیلن، کاپیسا ولایتی الهسای تومنینینگ اینگ گوجوم حدودلریدن بیری حسابلنهدی. اوشبو دره اهالیسی، زمانهوی یول و صفتلی مخابراتی خذمتلر یوقلیگیدن شکایت قیلهدیلر.
اسکین درهسی اهالیسینینگ اکثریتی دهقانچیلیک و چارواچیلیک بیلن کون کیچیرهدی. اولر قتنش، ایکینچیلیک محصولاتلرینی تشیش، طبیات مرکزلری همده تومن بازارلریگه باریش اوچون توپراق و اوتیش قیین بولگن یولدن فایدهلنیشگه مجبور.
دره گه آلیب بارووچی یولده ۵۲ ته خوفلی بوریلیش موجود بولیب، بو اهالینینگ قتناوینی انچه قیینچیلیک بیلن روپهره قیلگن.
اولرنینگ ایتیشیچه، هر سفر یامغیر یاغگنده یولنینگ ایریم قسملری بوزیلیب کیتهدی، نتیجهده کسللرنی آلیب باریش، ایکینچیلیک محصولاتلرینی تشیش و ترانسپورت واسطهلرینینگ باریب کیلیشینی ینهده قیینلشتیرهدی.
هیداوچی جمعهگل شوندهی دییدی: «بو ییردن الهسایگه بارسک هم، الهسایدن اسکین گه قیتسک هم ساغ-سلامت ییتیب کیلمهیمیز. عیاللر یا کی کسللر بولسه، بعضاً پیاده یوریشگه مجبور بولهمیز. یول جوده یامان، کسللرنی ساغلیقنی سقلش مرکزیگه خوفسیز ییتکزیب بولمهیدی.»
محل یشاوچیسی نقیبالله گه کوره: «داواننینگ بلندلیگی بیز اوچون کتته معما. یول چیتیده اریق یا کی سوو چیقریش تیزیمی یوق. بیر مرته یامغیر یاغسه، یول بوزیلیب کیتهدی و منزل گه ۳-۴ ساعتده هم ییتیب باره آلمهیمیز.»
یول معمالریدن تشقری، مخابرات خذمتلر پستلیگی درهدهگی اساسی معمالردن بیری دیر.
اولر گه کوره، تلفونی علاقه قوریش یا کی مخابرات خذمتلریدن فایدهلنیش اوچون اولر تاغلی حدودلرده بیر نیچه ساعت یوریب، سیگنال بیرهدیگن جایگه چیقیشگه مجبور بولهدیلر.
محل یشاوچیلریدن غلام نبینینگ ایتیشیچه: «بعضاً بیر-ایکی ساعت داوانگه چیقهمیز، شوندن کیینگینه علاقه قیله آلهمیز یا کی الهسای گه باریب قونغیراق قیلهمیز. دولتدن اوشبو دره گه بیر نیچه مخابرات پایه قوندیریش اوچون دقت قیلیشنی سورهیمیز.»
محل یشاوچیلریدن باشقه بیری عبدالهادی شوندهی دییدی: «تلفون جوده آز جایده ایشلهیدی، اسلام امیرلیگیدن، سلام، روشن، اریبا یا اتصالات پایهلرینی اورنهتیشنی سورهیمیز، شونده اسکیندن تشقریده یشهیاتگن عایله اعضالریمیز بیلن باغلنه آلهمیز.»
شو بیلن بیرگه، محلی مسئوللر موجود معمالرنی تصدیقلب، اولرنی برطرف ایتیش بوییچه ریجهلر ایشلب چیقیلگنینی معلوم قیلهدیلر.
کاپیسا فواید عامه ریاستی باشلیغی بحرالله بدری شوندهی دییدی: «حاضر عملگه آشیریلهیاتگن الهسای یول لایحهسی یکونلنگچ، ریجه اساسیده اسکین یولینی هم قوریش ایشلی باشلنهدی. بو لایحه تنلب آلینگن.»
کاپیسا ولایتی مخابرات و تکنالوژی معلوماتی باشلیغی دلاور برهان ایسه شوندهی دییدی: «الهسای اهالیسی گه شونی ایتهمن کی، جاری ییل اسکین درهسی و اونگه قوشنی کوته قیشلاغیده مخابرات ترماقلری ایشگه توشیریلهدی. بو حدود اوچون ایکیته پایه اورنهتیلیشنی ریجهلشتیرگن میز.»
الهسای تومنی اسکین درهسی اهالیسی، مسئوللرنینگ زمانهوی یول قوریلیشی و مخابرات خذمتلرینی یرهتیش بوییچه بیرگن وعدهلری عملگه آشیشگه امیدوار ایکنلرینی بیلدیرهدیلر. اولرنینگ فکریچه، بو آرقهلی حدود دهگی قتناو و علاقه بیلن باغلیق معمالر برطرف ایتیلهدی.
