بدخشان مرکزی فیضآباد شهری ایریم یشاوچیلری، سونگی ایکی هفته دوامیده بعضی کونلرده حتا ۸ و ۱۰ ساعت برقلری بولمهگنینی ایتهدیلر. اولر گه کوره، برق اوزیلیشی، بالهلر تعلیمی، اقتصادی فعالیتلر و عایلهلرنینگ کوندهلیک حیاتیگه سلبی تأثیر قویگن.
فیضآباد شهری یشاوچیسی بولگن ندیمالله گه کوره، هوا ایسیغیده برق یوقلیگی سببلی بالهلر بیزاوته بولهدی و اولر کیچهلری درسلرینی یخشی اوقی آلمهیدیلر. او شوندهی دییدی: «قریب ایکی هفتهدن بیری برقلر کیچه یا کی کوندوز تاماندن ۶-۷ ساعت اوزیلهدی. بو ایسیق هواده پکه، کولر و باشقه ساووتیگچ اوسکونهلر گه احتیاجیمیز بار. یشاوچیلرنینگ اوشبو کیچه-کونلرده برقلری بولیشی لازم.»
فیضآباد شهری یشاوچیلریدن بولگن فرهاد، موبایل تلفونلرنی تعمیرلهیدی ایتیشیچه، منتظم برق یوقلیگی ایشیگه سلبی تأثیر قویگن.
اونینگ کوپهیتیریشیچه، برق اوزیلیشی سببلی هر کونی بیرین-کیتین مجازلرینی قولدن بیرماقده و درآمدی هم کمهیگن. او شوندهی دییدی: «برققه احتیاجیمیز کوپ، ایکی هفتهدن بیری برقیمیز یوق. مجازلر کیلهدی بیراق قیتیب کیتهدیلر برق یوقلیگی سببلی.»
بدخشان مرکزی فیضآباد شهری یشاوچیلریدن بولگن داوود، ایریم کیچهلر برق یوقلیگی سببلی بالهلری درس اوقی آلمسلیگینی بیلدیرهدی. او مسئوللردن بوتوغریده جدی دقت قیلیب و یشاوچیلرنی منتظم برق بیلن تأمینلشلرینی سورهیدی. اونگه کوره: «شونی ایستهیمیز کی، دایمی و منتظم روشده برقیمیز بولسین؛ چونکی هر کونی تورلی قیینچیلیک بیلن روپهره بولهمیز. بیر تاماندن هوا ایسیق، برق یوقلیگی احوالنی آغیرلشتیرهدی و بالهلریمیز کسل بولهدی.»
شو بیلن بیرگه، بدخشان ولایتی برشنا ریاستی مسئوللری، برق انده-سنده تخنیکی قیینچیلیک سببلی اوزیلهدی و بو معما دایمی ایمسلیگینی ایتهدیلر.
بدخشان برشنا باشلیغی میرویس سیرت گه کوره، برق ساحهسیده تاپیلگن قیینچیلیک حل ایتیلگن و یشاوچیلر دایمی برقدن فایدهلنیشلری ممکن. اونینگ ایتیشیچه: «هیچ قندهی قیینچیلیک یوق و همه نرسه فعال. تخنیکی قیینچیلیک سببلی انده-سنده برق اوزیلهدی؛ بیراق برق اوزیلیشی اساسی معما ایمس و مردمنی قیینچیلیک بیلن دوچ قیلمهیدی.»
شو بیلن بیرگه، فیضآباد شهری یشاوچیلرینینگ ایتیشیچه، ایسیق هواده، کوندهلیک احتیاجلرینی تأمینلش، اقتصادی فعالیتلر همده ساووتگیچ اوسکونهلردن فایدهلنیش اوچون برققه احتیاجلری بار و بو معما تیزلیک بیلن اساسی شکلده حل ایتیلیشی کیرهک.
