بدخشان ولایتی شغنان تومنی شدوج، سرچشمه و وریزن قیشلاقلرینینگ برقی اوزیلگنیدن قریب بیر ییل اوتماقده ایکن، بو قیشلاقلرنینگ یشاوچیلری برق یوقلیگی سببلی ایریم قیینچیلیکلر بیلن دوچ ایکنلریدن شکایت قیلماقده.
اولرنینگ ایتیشیچه، برق یوقلیگی اینیقسه کیچه تاماندن اولرنی ایریم قیینچیلیک بیلن دوچ قیلگن و کوپینچه عایلهلر اویلرینی یاریتیش اوچون سولری چراقلر، نفتی چراقلر یا کی دستلبکی امکانیتلردن فایدهلنهدی، بیراق بو اوسکونهلر اولرنینگ احتیاجلرینی قاندیره آلمهیدی.
شغنان تومنی شدوج تومنی یشاوچیسی شبیر، برق یوقلیگی کوپراق بالهلر و اوسمیرلرنینگ تعلیمیگه سلبی تأثیر قویگنینی بیلدیرهدی. او شوندهی دییدی: «یشاوچیلرنینگ برقی یوق. بالهلر کیچه تاماندن درس اوقی آلمهیدی و کوپینچه قیینیچلیکلر بار. اوقیش امکانیتی یوق، یشش و ایشلش اوچو شرایط مناسب ایمس.»
شغنان تومنی یشاوچیلریدن بولمیش میلاد، برق یوقلیگی طفیلی بالهلری کیچه تاماندن نفتی چراقلردن فایدهلنیب درس اوقیشلرینی معلوم قیلهدی.
اونگه کوره، بو چراقلرنینگ دودی بالهلر و عایله اعضالری اورتهسیده ساغلیق قیینچیلیگیگه سبب بولگن. اونینگ ایتیشیچه: «یاز موسومیده پنکه کیرهک؛ گرچند قیشده اونگه احتیاج یوق. کوپینچه عایلهلرنینگ موزلتگیچی بار، بیراق برق یوقلیگی سببلی اوندن فایدهلنیشه آلمهیدی. قیینچیلیک کوپ؛ برق بولمسه یشاوچیلر کیچه تاماندن آوقت استعمال قیلیش و عادی ایشلرنی عملگه آشیریشده قیینچیلیک بیلن دوچ بولهدی.»
شغنان سرچشمه تومنی یشاوچیسی و آنلاین ایش بیلن شغللنووچی عصمتنینگ ایتیشیچه، برق اوزیلیشی اقتصادی ضررلر بیلن بیرگه اونینگ علاقه واسطهلریدن فایدهلنیش امکانیتینی هم چیکلب قویگن.
اونینگ کوپهیتیریشیچه، برقسیزلیک نهفقط ایشیگه سلبی تأثیر قویگن، بلکی مجازلر بیلن علاقه قوریش و کوندهلیک ایشلرینی عملگه آشیریشده ایریم قیینچیلیک بیلن روپهره قیلگن. او شوندهی دییدی: «مین آنلاین ساحهسیده شغللنهمن، بیراق برق یوقلیگی سببلی ایشلریمنی یخشی عملگه آشیره آلمهی من. کمپیوتر یا کی تلفونمنی قووتی (شارژی) توگسه، آنلاین ایشلرنی قیله آلمهی من. شونینگ اوچون آنلاین کوپینچه ایشلرنی قویباریب و شاقه ایشلرنی قیلیشگه مجبور بولگن من.»
بدخشان برشنا ریاستی مسئوللری، اوشبو قیشلاقلرنینگ برقی ترانسفارمر بوزیلگنلیگی سببلی اوزیلگن و قیته توزهلگنیدن کیین ینه هم تخنیکی قیینچیلیک تاپگنینی ایتهدیلر.
اوشبو اداره باشلیغی میرویس سیرت گه کوره، شغنان تومنینینگ برق قیینچیلیگینی حل قیلیش اوچون سعی-حرکت قیلماقدهلر. او شوندهی دییدی: «مین اوزیم بیر مرته برشنا عمومی ریاستینینگ مالیهوی باشلیغی بیلن بیرگه باردیم ترانسفارمرنی مزارشریفده توزهتیب و آلیب باریب قوندیردیک، بیراق بیر مدت اوتگچ بوزیلدی. ینه هم آلیب باریب قندوز گه توزهتدیک، بیراق ینه هم شارت قیلدی و اوچینچی مرته اونی توزهتیش گه سعی-حرکت قیلهیپمیز.»
بدخشان شغنان تومنی تاجیکستاندن آلیب کیلینگن برق بیلن تأمینلنگن؛ بیراق ترانسفارمر بوزیلیشی و شغنان تومنیده برق توزیع قیلیش ترماغیدهگی تخنیکی قیینچیلیک، بو تومن اکثر حدود یشاوچیلرینی تورلی قیینچیلیک بیلن دوچ قیلگن.
