تخار ولایتی بهارک تومنی یشاوچیلریدن قطارینینگ ایتیشلریچه، ایچیملیک سوو یوقلیگی سبب تورلی کسللیکلرگه چلینگنلر. اولر، نیازلری بولگن سوونی تالقاننینگ شهروان نهریدن تامین قیلیشلرینی بیان قیلیب و کوپهیتیریشلریچه، بو سوو بیر نیچه آی دوامیده سقلهنیب قالیشی و توختهب قالیشی سبب، افلاسلنگن.
بهارک تومنینینگ «چقلقیشلاق» یشاوچیلریدن عبدالغفارگه کوره، پاک بولمهگن سوولردن فایدهلنیش بالهلرینینگ کسل بولیشیگه سبب بولگن. «هر بیر عایلهده بیر، ایکی یا-ده بیش کیشی کسل بولگن. حاضر اوییمیزده اوچ ته باله قریب اوچ آیدن بیری کسل دیر.»
مذکور قیشلاق یشاوچیلریدن باشقه بیری عبدالمحمد، ایچیملیک سوودن فایدهلنه آلمسلیککه تاکیدلب و ایتیشیچه: «کته و کیچیک تورلی کسللیکلرگه چلینگن. بیرینینگ باشی، بیرینینگ ایاغی و بیرینینگ معدهسی آغریدی. ایچیملیک سوودن فایدهلنه آلمهیمیز و برچهمیز ۱۵ کینگشده کسللیکلرگه چلینگنمیز.»
شونینگدیک حاجی پهلوان کینگش باشلیغی محمداللهنینگ ایتیشیچه، محل یشاوچیلر نیازلری بولگن سوونی تخار مرکزی تالقان شهریدن ساتیب آلهدیلر. «فایدهلنهدیگنیمیز سوو شهروان نهری سووی دیر. اوغریقولدن حاجیمجرگچه برچه کیشی اوشبو سوودن فایدهلنهدیلر. ایچیملیک سوودن فایدهلنه آلمهیمیز و بو سوولر فایدهلنیش امکانیتیگه ایگه ایمس، لیکن مجبورمیز. برچه کیشی کسل بولگن.»
قوم بویوکلریدن بیری محمدنسیمنینگ ایتیشیچه، بو منطقهده قریب ۱۰ دن ۱۲ مینگ کیشی پاک بولمهگن سوولردن فایدهلنهدیلر. اونینگ کوپهیتیریشیچه، حاضرگچه اولرنینگ قیینچیلیکلریگه اعتبار بیریلمهگن. «نه اوتگن دولت توجه قیلدی و نه حاضرگی دولت. بعضا موسسهلردن قطاری کیلیب و لوله تارتیش کبی کیچیک لایحهلرنی عمل گه آشیرهدیلر.»
شوندهی بیرحالده، شفاکارلرنینگ آگاهلنتیریشیچه، افلاسلنگن سوولردن فایدهلنیش تورلی کسللیکلرگه چلینیش خوفینی کوپهیتیرهدی. شفاکارلردن بیری قلندرشاهنینگ ایتیشیچه: «افلاسلنگن سوودن فایدهلنیش ایچ کیتمه، قیتریش، وبا، آمیب و باشقه بیر قطار کسللیکلرگه سبب بولهدی.»
شونینگدیک بهارک تومنی ولسوالی محمد همایون، بو قیینچیلیکنی تصدیقلب و ایتیشیچه، بودجه تامینلنگنی صورتده، مذکور منطقهلرده ایچیملیک سوو لایحهلری عملگه آشیریلشی ممکن. «موسسهلر و خیرلی کیشیلر همکارلیگی بیلن بیرته قودوق و سوو ذخیرهسی توزهتیلیشی و کیین اهالی گه سوو ییتیشیشی اوچون لوله تارتیلیش ایشی عملگه آشیریلیشیگه قرار آلگنمیز.»
تالقان شهرینینگ بیر قطار بولیملری، بهارک، درقد، رستاق، هزارسموچ و خواجهغار تومنلریده، حاضرگچه یشاوچیلردن قطاری ایچیش اوچون ذخیره بولگن و توختهگن سوولردن فایدهلنهدیلر که بو وضعیت، پاک بولمهگن سوو طفیلی کسللیکلر کوپهیشی توغریسیده خواطرلرنی آشیرگن.
