بوگون “دوشنبه” هرات‌ده قراردادی اوقیتووچی‌لردن بیرقطاری حقوق‌لری توللنمه‌گنی سبب، ولایتی کینگش اعضالری و مدنی فعال‌لر حضوری بیلن اعتراضی ییغین یولگه قوییگنلر. اوشبو اوقیتووچیلر ایکی هفته دن آلدین اعتصاب قیلگن ایدی‌لر.
اولرنینگ ایتیش‌لریچه، ۶ آیدن بویان حقوق‌لری توللنمه‌گن و دولت اینقسه معارف وزیرلیگی بوتوغریده بیرگن وعده‌لریگه عمل قیلمه‌گن.
هرات ولایتی بوییچه اوقیتووچیلر کینگشی باشلیغی محمدصابر مشعل نینگ اوشبو ییغینده ایتیشیچه، حقوق‌لری توللنمه‌گن صورتده، کینگ شکلده اعتراض قیلیش‌لری ممکن.
اعتراضچی‌لرنینگ معارف وزیرلیگی‌نی وعده‌سیگه عمل قیلمه‌گنیدن خواطر بیلدیریب ایتیش‌لریچه، حقوق‌لری توللنمه‌گنی چیککه‌سیده، حاضرگه‌قدر اولر بیلن قرارداد هم بولمه‌گن.
اوقیتووچی‌لردن بیری میر سلیم فایق نینگ ایتیشیچه، اوتگن ییل کرونا ویروسی ترقه‌لگنی سبب، ۳ آی‌لیک حقوق‌لری توللنمه‌گن. «مالی ییلدن کمیده ۶ آی اوتماقده، لیکن بیزنینگ وضعیتی‌میزگه دقت قیلینمه‌گن و اوتگن ییل هم کرونا ویروسی ترقه‌لگنی سبب، ۳ آی حقوق‌لریمیزنی بیرمه‌دیلر و حاضرده هم ۱۳ کوندن بویان ایش اعتصابی‌گه قول اورگن‌میز و هیچ ایش قیلمه‌یمیز.»
هرات ولایتی کینگش عضالری و مدنی فعال‌لرنینگ حکومت اینقسه معارف وزیرلیگی دن تنقید قیلیب ایتیش‌لریچه، اوشبو اوقیتووچی‌لری ایستکلریگه دقت بولمه‌گن صورتده عدالت ایسته‌ش گه دوام بیره‌دیلر.
بیراق، هرات ولایتی بوییچه معارف ریاستی باشلیغی زکریا رحیمی نینگ ایتیشیچه، کیله‌سی نیچه کون جریانیده قراردادی اوقیتووچی‌لرنینگ حقوق‌لری توللنه‌دی. اونینگ ایتیشیچه، ینگی‌لیکده جمهورلیک ریاستی معارف وزیرلیگی گه قراردادی اوقیتووچی‌لرنینگ حقوق‌لری توللنیشی خصوصیده بویروغ بیرگن.
حاضرده هرات ولایتیده ۳ مینگ دن آرتیق اوقیتووچی قراردادی شکلده تدریس قیله‌دی.
